ފާއިތުވި 24 ގަޑިއިރު ތެރޭގައ އެންމެ ބޯކޮށް ވާރޭ ވެހުނީ ރ.އަލިފުއްޓަށް ކަމުގައި މޫސުމާއި ބެހޭ ގައުމީ އިދާރާ (މެޓް އޮފީސް) އިން ހާމަކޮށްފިއެވެ. 

އެ އިދާރާއިން ހާމަކުރި ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ތެރޭގައި އަލިފުއްޓަށް ޖުމްލަ 40.4 މިލިމީޓަރުގެ ވާރޭ ވެހިފައިވާއިރު ދެވަނަ އަށް އެންމެ ބޯކޮށް ވާރޭ ވެހުނު ނ.މާފަރަށް 40.1 މިލިމީޓަރުގެ ވާރެ ވެހިފައިވެއެވެ. ތިން ވަނަ އަށް އެންމެ ގިނައިން ވާރޭ ވެހުނު ރަށަކީ ހދ.މަކުނުދޫ އަށް ވާއިރު ފާއިތުވި 24 ގަޑިއިރު ތެރޭގައި އެރަށަށް ވަނީ 37.9 މިލިމީޓަރުގެ ވާރޭ ވެހިފައެވެ.

ރާއްޖޭގެ އެހެން ހިސާބުތަކަށް ބަލާ އިރު، ފާއިތުވި 24 ގަޑިއިރު ތެރޭގައި ދެން އެންމެ ބޯކޮށް ވާރޭ ވެހުނީ ށ.ކޮމަންޑޫ (29.7 މިލިމީޓަރު)، ހުޅުލެ (26.1 މިލިމީޓަރު)، މާލެ (21.1 މިލިމީޓަރު) އަށެވެ.

މެޓް އޮފީހުން ބުނީ މިއަދު އިރުއޮއްސި 18:00 އާއި ހަމައަށް ރާއްޖޭގެ އެކި ހިސާބަށް ވިއްސާރަ ކުރުމާއިއެކު ގުގުރާނެ ކަމަށާއި، ބައެއް ރަށްތަކަށް ގަދަ ވަޔާއިއެކު ބޯކށް ވާރޭ ވެހުން އެކަށީގެންވާ ކަމަށެވެ.

ވިލާގަނޑުގައި 55 މޭލަށް ވައިގަދަވުން އެކަށީގެންވާއިރު، ކަނޑުތައް އާއްމުގޮތެއްގައި ގަދަވާނެ ކަމަށް އެއިދާރާއިން ލަފާ ކުރެއެވެ.

ރާޅު 9-6 ފޫޓާއި އާއި ދެމެދަށް އުސްވާނެ ކަމަށާއި، ބޯކޮށް ވާރޭވެހި ވަޔާއި ކަނޑުތައް ވެސް ގަދަވެ އުދައަރާނެ ކަމަށް ލަފާ ކުރެވޭތީ ހުރިހާ ފަރާތްތަކުން ހާއްސަކޮށް ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން އިލްތިމާސް ކުރެއެވެ.