ވަރކް ވިސާގެ ޚިދުމަތް ހޯދުމަށް މޯލްޑިވްސް އިމިގްރޭޝަނުން "އޭންޓް ކިޔޫ" އެޕްލިކޭޝަން މެދުވެރިކޮށް ނަންބަރު ދޫކުރަން ފަށައިފިއެވެ.

އިމިގްރޭޝަނުން ބުނީ، މިއީ ސަރުކާރު އިދާރާތަކުން ފޯރުކޮށްދޭ ޚިދުމަތްތައް ރައްޔިތުންނަށް ވީހާވެސް ފަސޭހަކަމާއިއެކު ފޯރުކޮށްދިނުމަށް މި ސަރުކާރުން ކުރަމުންދާ މަސައްކަތުގެ ދަށުން ގެނައި ބަދަލެއް ކަމަށާއި، މިބަދަލާއިއެކު، މިއަދުން ފެށިގެން ވަރކް ވިސާ ޖެހުމަށްފަހު ޕާސްޕޯޓާއި ހަވާލުވުމަށް އޮންލައިންކޮށް "އޭންޓް ކިޔޫ" އެޕްލިކޭޝަން މެދުވެރިކޮށް ނަންބަރު ދޫކުރުމަށް އެއިދާރާއިން ނިންމާފައިވާ ކަމަށެވެ.

ކަނޑައާޅާފައިވާ ގަޑީގައި އޮންލައިން ކޮށް "އޭންޓް ކިޔޫ" މެދުވެރިކޮށް ކޮންމެ ތަނެއްގައި ހުރެގެންވެސް ނަންބަރު ނެގޭނެ ކަމަށާއި، ކިޔޫގައި ޚިދުމަތްދެމުންދާ ތަރުތީބު ވަގުތުން ބަލާލެވޭނެކަމަށް ވެސް އިމިގްރޭޝަނުން މައުލޫމާތުދެއެވެ.

އިމިގްރޭޝަނުން ބުނީ، ވަރކް ވިސާ ޖެހުމަށްފަހު ޕާސްޕޯޓާއި ހަވާލުވުމަށް ނަންބަރު ނެގުމަށްޓަކައި "އޭންޓް ކިޔޫ" އެޕްލިކޭޝަން މެދުވެރިކޮށް 5 ނުވަތަ އެއަށްވުރެ މަދު ޕާސްޕޯޓާއި ހަވާލުވާ ފަރާތްތަކުން ނަންބަރު ނަގަންޖެހޭނީ ހެނދުނު 9:00 އަކުން 10:30 އަކަށް ކަމަށާއި، މި ނަންބަރުތަކަށް ޚިދުމަތް ދިނުމަށް ހަމަޖެހިފައިވަނީ ހެނދުނު 10:00 އަކުން މެންދުރުފަހު 3:00 އަކަށް ކަމަށެވެ.

ހަމައެއާއިއެކު، 6 ނުވަތަ އެއަށްވުރެ ގިނަ ޕާސްޕޯޓާއި ހަވާލުވާ ފަރާތްތަކުން ނަންބަރު ނެގުމަށް މެންދުރު 11:30 އިން 12:30 އަށް ކަނޑައަޅާފައިވާއިރު، މި ނަންބަރުތަކަށް ޚިދުމަތް ދޭނީ މެންދުރު 1:15 އިން 3:00 އަށެވެ.

އިމިގްރޭޝަނުން ބުނީ، އެ އިދާރާގެ ގްސަދަކީ ހިދުމަތް ހޯއްދަވާ ފަރާތްތަކަށް ވީހާވެސް އަވަސް، ލުއިފަސޭހަ ޚިދުމަތްތަކެއް ހޯދޭނެ މަގު ފަހިކޮށްދީ، ހިދުމަތްތައް އިތުރަށް ހަރުދަނާކުރުން ކަމަށެވެ.