އިސްލާމިކް ރިޕަބްލިކް އޮފް އީރާނުގެ ރައީސް ޑޮކްޓަރ އިބްރާހީމް ރައީސީ އަވަހާރަވުމުގެ ހިތާމައިގައި، އެމްޑީޕީން ތައުޒިޔާ ފޮނުވައިފިއެވެ. 

އީރާނުގެ ރައީސް އިބްރާހީމް ރައީސީ އަވަހާރަވެފައި ވަނީ އޭނާ ދަތުރުކުރެއްވި ހެލިކޮޕްޓަރު ވެއްޓި، ހިނގި ހާދިސާއެއްގައެވެ. މި ހާދިސާގައި އެ ގައުމުގެ ފޮރިން މިނިސްޓަރުވެސް ވަނީ އަވަހާރަވެފައެވެ. 

އެކަމާއި ގުޅިގެން އެމްޑީޕީން ނެރުނު ބަޔާނެއްގައިވަނީ، އެ ހިތާމާއިގައި ބައިވެރިވެ، އިރާނުގެ ސަރުކާރާއި އެގައުމުގެ ރައްޔިތުންނަށް ތައުޒިޔާ ފޮނުވާފައެވެ. 

Advertisement

އަދި ރައީސީ އާއި ދެންވެސް ހެލިކޮޕްޓަރ ގައި ރޯވި ހާދިސާގައި އަވަހާރަވި އެންމެންގެ ފުރާނައަށް ސުވަރުގޭގެ ދާއިމީ ނިޢުމަތް ދެއްވުން އެދި ދުޢާ ވެސް ކޮށްފައިވެއެވެ. 

ކުއްލި ހާލަތެއް މެދުވެރިވެ, އިއްޔެގެ ވަގުތެއްގައި ރައީސީ އިންނެވި ހެލިކޮޕްޓަރު ބިމަށްތިރި ކުރަންޖެހި، އެ ހާދިސާގައި ހެލިކޮޕްޓަރ އަނދައި، ހެލިކޮޕްޓަރުން ދަތުރުކުރި އެންމެން އަވަހާރަވެފައިވާ ކަމަށް އީރާނުން މިހާރުވަނީ ރަސްމީކޮށް އިއުލާން ކޮށްފައެވެ.  

އެގޮތުން ރައިސީއާއެކު ދަތުރުކުރެއްވި އެޤައުމުގެ ޚާރިޖީ ވަޒީރު ހުސައިން އަމީރު އަބްދުالله ހިޔާންއާ، އިރުމަތީ އަޒަރުބައިޖާން ޕްރޮވިންސްގެ ގަވަރުނަރު މަލިކް ރަހުމަތީ އަދި ތަބްރީޒް މިސްކިތުގެ އިމާމް އާޔަތުالله އަލްހާޝިމީވެސް އަވަހާރަވެފައިވާކަމަށް އިރްނާއިން ވަނީ ރިޕޯޓުކޮށްފައެވެ.