ތިމަރަފުށީ ދާއިރާގެ ކުރީގެ މެންބަރު މުޙައްމަދު މުސްތަފާ (މުސްތަފާބެ)އަށް 1 މިލިއަނަށްވުރެ ގިނަ ރުފިޔާ ދައްކަން ނިމިދިޔަ ސަރުކާރުގެ ޕްލޭނިންގް މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީންގެ މައްޗަށް ސިވިލްކޯޓުން ހުކުމްކޮށްފިއެވެ.

އަކްރަމް އާއި ދެކޮޅަށް ސިވިލް ކޯޓަށް މުސްތަފާ މައްސަލަ ހުށަހަޅާފައިވަނީ އަކްރަމް އަނބުރާ ދައްކާގޮތައް މުސްތަފާ އަތުން ނަގާފައިވާ 1.7 މިލިއަން ރުފިޔާ އަނބުރާ ދެއްކުމަށް ދީފައިވާ ޗެކުތަކުން ފައިސާ ލިބިފައިނުވާކަމަށް ބުނެއެވެ.

މިގޮތުން މުސްތަފާ ހުށައެޅި މައްސަލައިގައި ބުނެފައިވަނީ އަނބުރާ ދޭގޮތަށް މުސްތަފާގެ އަތުން އަކްރަމް ރުފިޔާ ނަގާފައިވާ ކަމަށެވެ. އަދި އޭގެ ތެރޭގައި ހިމެނޭ 1.15 މިލިއަންރުފިޔާ އާއި، 300،000 ރުފިޔާއާއި، 200،000 ރުފިޔާއާއި 60،000 ރުފިޔާ އާއި ޝަރީއަތަށް ހަރަދުވި 100،000 ރުފިޔާ އާއިއެކު ޖުމްލަ 1.8 މިލިއަން ރުފިޔާ ހޯދުމަށް މުސްތަފާ ވަނީ ހުށައަޅާފައެވެ.

މި ދައުވާގެ ޖަވާބުގައި އަކްރަމް ކަމާލުއްދީންގެ ފަރާތުން ބުނީ، މުސްތަފާގެ އަތުން އަކްރަމް ނަގާފައިވާކަމަށް ބުނެފައިވާ ފައިސާ އަކީ އަކުރަމް ކަމާލުއްދީން އަށް މުސްތަފާ ދިން ފައިސާކަން ސާބިތުކޮށްދޭން ޖެހޭ ކަމަށާއި، މިފައިސާ ނަގާފައިވާ ދުވަސް ވަރަކީ އަކްރަމް އަށް މާލީ ގޮތުން އެތައް ދަތިތަކެއް ކުރިމަތިވެފައިވާ ދުވަސްވަރެއް ކަމަށެވެ.

އެކަމުގެ ނާޖާއިޒު ފައިދާ ނެގުމަށް މުސްތަފާ މަސައްކަތް ކުރި ކަމަށް ތުހުމަތުކޮށް އަކްރަމް ބުނީ، ނަގާފައިވާ ފައިސާއަށް ވުރެ މަތީ އަދަދުތަކަކަށް ޗެކު ދޫކުރުމަށް ބޮރު ދައްކައި ޗެކު ހޯދާފައިވާ ކަމަށާއި، ވަކީލު ފީއާއި ގޮތުން ދެފަރާތުގެ ދެމެދުގައި އެއްވެސް އެއްބަސްވުމެއް ވެވިފައިނުވާތީ އެ ފައިސާ ނަގައިނުދެވޭނެ ކަމަށެވެ.

މި މައްސަލައިގައި މުސްތަފާ އަށް އަކުރަމް ދައްކަން ޖެހޭ ފައިސާގެ ތެރެއިން 400،000 ރުފިޔާ ދެއްކި ކަމަށް އަކްރަމް ބުނި ނަމަވެސް ސިވިލް ކޯޓުން ވަނީ އެ މުއާމަލާތް ސާބިތުކުރުމަށް ބޭނުންވާ ހެކި ހުށަހެޅިފައިނުވާކަމަށާއި، ސާބިތު ހެކި ހުށަހެޅިފައިވަނީ އަކްރަމްގެ ފަރާތުން ހަމައެކަނި 200،000 ރުފިޔާ ރައްދުކުރިއިރުކަމަށް ބުނެފައެވެ.

ހަމައެއާއިއެކު، ޝަރީއަތަށް މައްސަލަ ހުށަހެޅުމަށް 100،000 ހަރަދުވިކަމަށް މުސްތަފާ ބުނިނަމަވެސް، އެކަމުގެ ހެއްކެއް ނެތުމުން  އަކްރަމްގެ އަތުން އެ އަދަދު ނަގައި ނުދެވޭނެކަމަށް ވެސް ސިވިލް ކޯޓުން ކުރި ހުމުގައި ވެއެވެ.

އެހެންކަމުން ސިވިލް ކޯޓުން ވަނީ އަކްރަމް މުސްތަފާގެ އަތުން ނަގާފައިވާ ފައިސާގެ ތެރެއިން 400،000 ރުފިޔާއާއި 50،000 ޑޮލަރު ޖުލައި 19 ގެ ކުރިން ދައްކައި ނިންމުމަށް އަކްރަމް އަށް ހުކުމް ކޮށްފައެވެ.