އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ އާއި އެ ގައުމުގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރުމުގެ އަމުރަކަށް އިންޓަނޭޝަނަލް ކްރިމިނަލް ކޯޓް (އައިސީސީ) ގައި އެދުމާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މަރުހަބާ ވިދާޅުވެއްޖެއެވެ.

ރައީސް ޑރ.މުޢިއްޒު މަރުޙަބާ ވިދާޅުވެފައިވަނީ އެމަނިކުފާނު އެކްސް ގައި ކުރެއްވި ޕޯސްޓެއްގައެވެ.

މިގޮތުން ރައީސް ޑރ.މުޢިއްޒު ވިދާޅުވީ އައިސީސީ ގައި ނަތަންޔާހޫ އާއި ޔޯވް ގަލަންޓް ހައްޔަރު ކުރުމުގެ އަމުރަކަށް އެދުމާއި ގުޅިގެން އެކަމަށް ރާއްޖެ އިން މަރުހަބާ ކިޔާ ކަމަށެވެ.

މިއީ ފަލަސްތީނުގެ ރައްޔިތުންނަށް އިންސާފު ލިބިދިނުމަށްޓަކައި އެޅުނު މުހިންމު ފިޔަވަޅެއްކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، އެއްވެސް ގައުމަކީ ބައިނަލްއަގްވާމީ ގާނޫނަށްވުރެ މަތީގައިވާ ބައެއް ނޫންކަމަށާއި ހިފާފައިވާ ފަލަސްތީނުގެ ބިމުގައި ހަނގުރާމައިގެ ޖަރީމާތައް ހިންގާ ފަރާތްތައް ޖަވާބުދާރީވާން ޖެހޭނެކަމަށެވެ.

ޣައްޒާގައި އިޒްރޭލުން ހަނގުރާމައިގެ ޖަރީމާތަކާއި އިންސާނިއްޔަތާ ހިލާފު ޖަރީމާތައް ހިންގާފައިވާކަން ސާބިތުކުރެވޭ ވަރަށް ޕްރޮސެކިއުޓާ އޮފީހުން ހެކި ހޯދާފައިވާކަމުގެ ޔަގީންކަން ރާއްޖެއަށް އެބައޮތްކަމަށް ވިދާޅުވެ ރައީސް ޑރ.މުޢިއްޒު ވަނީ ބައިނަލްއަގްވާމީ މައިދާންތަކުގައި ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދެވޭނެ ހުރިހާ މަގެއް ހޯދާނެ ކަމުގެ ޔަގީންކަން ދެއްވާފައެވެ.

ނަތަންޔާހޫ އާއި އެ ގައުމުގެ ޑިފެންސް މިނިސްޓަރު ޔޯވް ގަލަންޓް ހައްޔަރު ކުރުމުގެ އަމުރަކަށް އައިސީސީ ގައި އެދިފައިވާކަން ހާމަކޮށްފައިވަނީ މިއަދުއެވެ.

މިކަމާއި ގުޅޭ ގޮތުން ވާހަކަ ދައްކަވަމުން އިންޓަނޭޝަނަލް ކްރިމިނަލް ކޯޓުގެ ޗީފް ޕްރޮސެކިއުޓާ ކަރީމް ހާން ވިދާޅުވީ ފަލަސްތީނާއި ގުޅޭގޮތުން އައިއޭސީ އަށް ހުށައެޅިފައިވާ މައްސަލައިގެ ފުރަތަމަ ޕްރި ޓްރައިއަލް ޗެމްބާ ފެށުމުގެ ކުރިން އެމީހުން ހައްޔަރު ކުރުމުގެ އަމުރަކަށް އެދި އައިސީސީގެ ފަނޑިޔާރުންގެ ޕެނަލް އަށް ހުށަހަޅާފައިވާނެ ކަމަށެވެ.

އެގޮތުން ހާން ވިދާޅުވީ، އޭނާގެ އޮފީހުން އެއްކުރުމަށްފަހު ބެލި ހެކިތަކުގެ މައްޗަށް ބިނާކޮށް ފަލަސްތީނުގައި މިހާރު ހިންގަމުންދާ ގަތުލު އާއްމަށް ނަތަންޔާހޫ އާއި ޔޯވް ގަލަންޓް ޒިންމާވާން ޖެހޭ ކަމަށް ނިންމޭނެ ސަބަބުތައް ހުރި ކަމަށެވެ.

އެގޮތުން ހާން ވަނީ ނަތަންޔާހޫ އާއި ޔޯވް ގަލަންޓް ގެ މައްޗަށް 7 ދައުވާއެއް އުފުލާފައެވެ. އެއީ:

1) ހަނގުރާމައިގެ ތެރޭގައި ޣައްޒާގެ އާއްމުން ބަނޑުހައިހޫނުކަމުގައި ތިބުމަށް މަޖުބޫރު ކުރުން

2) ގަސްތުގައި މީހުންގެ ހަށިގަނޑަށް ބޮޑު ތަކުލީފެއް، ނުވަތަ ސިއްހަތަށް ގެއްލުންވާނެ ފަދަ ބޮޑެތި އަނިޔާތަކެއް ދިނުން

3) ގަސްތުގައި މީހުން މެރުން

4) ގަސްތުގައި އާއްމުންގެ އާބާދީތަކަށް އަމާޒުކޮށް ހަމަލާދިނުން

5) އެކި ގޮތްގޮތުން (ބަނޑުހައިހޫނުކަން، ހަމަލާ ދިނުން) މީހުންގެ ފުރާނަ ނައްތާލުން/ މީހުން މެރުން 

6) ފިތުނަ އުފެއްދުން

7) އެނޫން ވެސް އިންސާނިއްޔަތާއި ދެކޮޅަށް ހިންގާފައިވާ ޖަރީމާތައް

ހާން ވިދާޅުވީ، އެމީހުންނަށް ކޮށްފައިވާ ދައުވާ ތަކުގެ ތެރޭގައި، ޣައްޒާ އަށް އެހީ ވެއްދުމަށް ހުރަސް އެޅުން ވެސް ހިމެނޭ ކަމަށެވެ.