ޔަހޫދީ ފައުޖުން ކެނޑިނޭޅި ފަލަސްތީނުގެ ރަފާހަށް ދެމުންގެންދާ ހަމަލާތަކުގެ ސަބަބުން ރަފާހް ދޫކޮށް ދިޔަ މީހުންގެ އަދަދު 950،000 އަށް އަރައިފިއެވެ.

ރަފާހްގެ ގާތްގަނޑަކަށް 40% މިހާރު ޔަހޫދީ ސިފައިންގެ އަތްދަށުގައިވާއިރު، އެ ސަރަހައްދުގެ 60% އިން މިހާރު ވަނީ މީހުން ހުސްވެފައެވެ.

ބޭރުގެ ނޫސްތަކުން ރިޕޯޓް ކުރާ ގޮތުގައި ރަފާހް ގައި ބާކީ ތިބީ 400,000 ވަރަކަށް މީހުންނަށްވާއިރު، އޭގެ ތެރެއިން ގިނަ މީހުން ދިރިއުޅެމުންދަނީ ޣައްޒާގެ އައްސޭރިފަށުގެ ސަރަހައްދެއްކަމަށްވާ ޓެލް އަލް ސުލްތާންގައި އެވެ.

Advertisement

ރަފާހް އަށް ދޫކޮށް ދިޔަ އާއްމުންގެ ތެރެއިން ގިނަ މީހުން ޣައްޒާގެ އަލްމުވާސީ އަށް ދިޔައިރު، ބައެއް މީހުން ވަނީ ޣައްޒާގެ މެދުތެރޭގައި ހިމެނޭ ހިސާބުތަކަށާއި، ޚާން ޔޫނިސް އަށް ވެސް ބަދަލުވެފައެވެ.

ޔަހޫދީން ގެ ހަމަލާތަކާއި ގުޅިގެން ރަފާހް ދޫކޮށް މީހުން ދާން ފަށާފައިވާއިރު، މީގެ ކުރިން އިސްރާއީލުން ވަނީ އެމީހުންގެ "އަސްކަރީ އޮޕަރޭޝަނެއް" ހިންގުމަށްޓަކައި ރަފާހް ދޫކޮށް އާއްމުން ދިޔުމަށް އަންގާފައެވެ.

އެފަދައިން އެންގުމަށްފަހު މީހުން ރަފާހް އިން ނުކުންނަން ފެށިނަމަވެސް، ގިނަ ބަޔަކަށް ނުކުތުމުގެ ފުރުސަތު ނުދީ ޔަހޫދީން ވަނީ ރަފާހް ގެ ސަރަހައްދަށް ހަމަލާތައް ދޭން ފަށާފައެވެ.

ހައްދުފަހަނައަޅާފައިވާ ޔަހޫދީން ރަފާހް އަށް އަރައިގަނެފައިވާއިރު، އެމީހުން ވަނީ މިސްރާއި ޣައްޒާއާ ދެމެދު އޮންނަ ހަމައެކަނި ބޯޑަރުގެ ކޮންޓްރޯލް ވެސް ނަގާފައެވެ. މިއީ ޣައްޒާ އަށް އިންސާނީ އެހީ ފޯރުކޮށްދިނުމަށްޓަކައި ބޭނުންކުރާ މައި ބޯޑަރަކަށް ވާއިރު، ޔަހޫދީންގެ މި ލާއިންސާނީ އަމަލުގެ ސަބަބުން އެ ބޯޑަރު މެދުވެރިކޮށް ޣައްޒާ އަށް އެހީ އައުން ވަނީ ހުއްޓިފައެވެ.

އޭގެ ތެރޭގައި ޣައްޒާގެ ހޮސްޕިޓަލުތަކާއި ކްލިނިކްތައް ހިންގަން ބޭނުންވާ ތެޔޮވެސް ހިމެނޭއިރު، އެކަށީގެންވާ ވަރަށް ތެޔޮ އެތެރެނުކުރެވޭ ކަމަށާއި، އޭގެ ސަބަބުން ދާދި އަވަހަށް ޣައްޒާގެ ސިއްހީ ނިޒާމު އެއްކޮށް ހުއްޓޭނެ ކަމަށް ޣައްޒާގެ ހެލްތު މިނިސްޓްރީން ވަނީ ބުނެފައެވެ.

ޔަހޫދީ ފައުޖުން ރަފާހް ގެ ގެތަކަށް ވެސް ވައިގެ ހަމަލާތައް ދެމުން އަންނައިރު، ޔަހޫދީން ރަފާހް އަށް އަރައިގައިތީ ޣައްޒާގައި ހިންގަމުންދާ ގަތުލުއާއްމު ހުއްޓާލުމާއި ގުޅޭ ގޮތުން މުހިންމު މަޝްވަރާތަކެއް ކުރެވި، ހަމާސް އިން މިހަނގުރާމަ ހުއްޓާލުމަށް އެއްބަސްވުމަށް ނިންމާފައިވަނިކޮށްކަން ފާހަގަކޮށްލަން ޖެހެއެވެ.