ހޫނު ގަދަވުމާއި ގުޅިގެން އިންޑިއާގެ މޫސުމާއި ބެހޭ އިދާރާއިން އުތުރު އިންޑިއާގެ ސަރަހައްދުތަކަށް ކުރިއަށް އޮތް 5 ދުވަހަށް ރެޑް އެލާޓް ނެރެފިއެވެ.
އުތުރު އިންޑިއާގެ ސަރަހައްދުތައް ކަމަށްވާ ރާޖަސްތާނާއި، ޕަންޖާބް، ހަރިޔާނާ-ޗަންދީގަރު-ދިއްލީ، ހުޅަނގު އުއްތަރު ޕްރަދޭޝް އަށް އިންތިހާއަށް ހޫނުގަދަވެ މި ސަރަހައްދު ތަކަށް ރެޑް އެލާޓް ނެރެފައިވާއިރު، ދުވާލުގެ ވަގުތުތަކުގައި މި ސަރަހައްދުގެ ފިނިހޫނުމިން 47 ޑިގްރީ އަށް ވުރެ މައްޗަށްދާނެ ކަމަށް ވަނީ ލަފާކޮށްފައެވެ.
މޫސުމާއި ބެހޭ އިދާރާގެ ސައިންސްވެރިއެއް ކަމަށްވާ ނަރޭޝް ކުމާރު ވިދާޅުވީ، އިންޑިއާގެ އުތުރުގެ ހުރިހާ ހިސާބެއްގައި މިވަގުތު ފިނިހޫނުމިން ހުރީ އާންމު ހާލަތަށްވުރެ މަތީގައި ކަމަށްވާތީ އެކަމާއި ގުޅިގެން އެ ސަރަހައްދުތަކަށް ފާއިތުވި ތިން ދުވަސް ވަންދެން އެލާޓް ނެރެފައިވާ ކަމަށެވެ. އަދި ކުރިއަށް މޫސުން އޮތް ގޮތް ލަފާކޮށް، މޫސުމާއި ބެހޭ އިދާރާއިން އެ ސަރަހައްދުތަކަށް ރެޑް އެލާޓް ނެރުމަށް ނިންމާފައިވާކަމަށް އޭނާ ވިދާޅުވިއެވެ.
ހޫނު ގަދަވުމާއި ގުޅިގެން އިންޑިއާގެ ކަމާ ބެހޭ ފަރާތްތަކުން ވަނީ ހެނދުނު 11 އިން 4 އާއި ދެމެދު އާއްމުން ބޭރު ތެރެއަށް ނުކުމެ އުޅުން ވީހާ ވެސް މަދުކުރުމަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
