ދިވެހި ލެންގްއޭޖް ކަލްޗާ އެންޑް ހެރިޓޭޖްގެ ޑެޕިއުޓީ މިނިސްޓަރު މުހައްމަދު ސައީދު މޫސާ ވަޖުދީ ވެސް މަގާމުން އެކަހެރިކޮށް ސަސްޕެންޑް ކޮށްފިއެވެ.

ވޮއިސް އަށް ކަށަވަރު ވެފައިވާ ގޮތުގައި މިރޭ އޭނާ ވަނީ ސަސްޕެންޑް ކޮށްފައެވެ. އޭނާ ސަސްޕެންޑް ކުރީ ސީދާ ކޮން މައްސަލައަކާ ކަމެއް އަދި ސާފުނުވި ނަމަވެސް ސަސްޕެންޑް ކުރީ ބަލަމުންދާ ސުލޫކީ މައްސަލައަކާއި ގުޅިގެން ކަމަށް ވެސް ވޮއިސް އަށް ވަނީ އެނގިފައިވެއެވެ.

ކުރީގެ މަޝްހޫރު ފުޓްބޯޅަ ރެފްރީ ވަޖުދީ އަކީ ކުރީގެ ނޫސްވެރިއެކެވެ. އަދި އޭނާ ވަނީ ކުރީގެ ސަރުކާރުތަކުގައި ވެސް މަސައްކަތް ކޮށްފަ އެވެ.

ވަޖުދީ ސަސްޕެންޑް ކުރިއިރު ސްޕޯޓްސް މިނިސްޓްރީގެ ޑެޕިއުޓީ މިނިސްޓަރު ހުސައިން ޝިފާޒު ވެސް ވަނީ ސަސްޕެންޑް ކޮށްފަ އެވެ. ޑެޕިއުޓީ މިނިސްޓަރު ޝިފާޒު ސަސްޕެންޑްކުރީ އަހުލާގީ މައްސަލަތަކެއްގައި ކަން ވޮއިސް އަށް ވަނީ އެނގިފައެވެ. ނަމަވެސް އޭނާއަށް އޮތް އެ ތުހުމަތުތަކުގެ ތަފުސީލުތައް ސާފެއް ނުވެއެވެ.

ޔޫތު މިނިސްޓްރީގެ ޑެޕިއުޓީ މިނިސްޓަރުންގެ ގޮތުގައި ތިއްބަވައި ކޮންގްރެސް ޕާޓިގެ އެކްޓިވިސްޓުންގެ ގޮތުގައި މަސައްކަތް ކުރައްވާ މަރިޔަމް ޝިއުނާ އާއި މަލްޝާ ޝަރީފްގެ އިތުރުން މަހުޒޫމް މާޖިދުވެސް މީގެ ކުރިން ވަނީ ސަސްޕެންޑްކޮށްފައެވެ.

އެ ތިން ބޭފުޅުން ސަސްޕެންޑް ކުރީ ސަރުކާރަށް ސަނާ ކިޔަމުން ގޮސް އަވަށްޓެރި އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސް ކޮށްގެނެވެ.