ހައްދުފަހަނައަޅާފައިވާ އިސްރާއީލުން ފަލަސްތީނުގެ ރަފާހްއަށް ދެމުންގެންދާ ހަމަލާތަކާއި ގުޅިގެން ފަލަސްތީނުގެ ރެފިއުޖީންނަށް އދ ގައި އުފައްދާފައިވާ ރިލީފް އެޖެންސީ (ޔޫއެންއާރުޑަބްލިއުއޭ) އިން ރަފާހް ގައި ކާބޯތަކެތި ބެހުމުގެ މަސައްކަތް މެދުކަނޑާލައިފިއެވެ.

ޣައްޒާގައި އެހީ ފޯރުކޮށްދިނުމަށް މަސައްކަތް ކުރަމުންދާ މި އެޖެންސީ ގެ ހާލަތު ބަޔާންކޮށް ނެރެފައިވާ ރިޕޯޓެއްގައި ބުނީ، އިރުމަތީ ރަފާހްގައި ހިނގަމުންދާ އަސްކަރީ އޮޕަރޭޝަންގެ ނަތީޖާއެއްގެ ގޮތުން އެ ސަރަހައްދުގައި ހުންނަ ޔޫއެންއާރުޑަބްލިއުއޭގެ ޑިސްޓްރިބިއުޝަން ސެންޓަރާއި ވޯލްޑް ފުޑް ޕްރޮގްރާމް (ޑަބްލިއުއެފްޕީ) ގެ ގުދަނަށް ވަދެވޭނެ މަގު ބަންދު ވެފައިވާ ކަމަށެވެ.

އެހެންކަމުން، ބޭނުންވާވަރަށް ކާބޯތަކެތީގެ އެހީ ނުލިބޭތީ އާއި ރަފާހްގައި އެއްވެސް ރައްކާތެރިކަމެއް ނެތުމުން އެސަރަހައްދުގައި ކާބޯތަކެތީ ބެހުމުގެ މަސައްކަތް މެދުކަނޑާލުމަށް ނިންމާފައިވާކަމަށް އެ ރިޕޯޓްގައި ވެއެވެ.

މީގެ އިތުރުންވެސް ޔޫއެންއާރުޑަބްލިއުއޭ ގެ މި ރިޕޯޓްގައި ބުނީ، ރަފާހަށް އަމާޒުކޮށް ޔަހޫދީ ފައުޖުން ދެމުންގެންދާ ހަމަލާތަކުގެ ސަބަބުން ޣައްޒާ އަށް އެހީވެއްދުމަށް އެތައް ގޮންޖެހުންތަކަކާއި ކުރިމަތިލާން ޖެހިފައިވާކަމަށާއި، ޣައްޒާ އާއި މިޞްރާއި ދެމެދު އޮތް ބޯޑަރު ޔަހޫދީން ހުޅުވާލީ އެންމެ ދެދުވަހަށް ކަމަށްވާއިރު އެ ދެ ދުވަހު ޣައްޒާ އަށް ވަނުމަށް ހުއްދަދީފައިވަނީ އެންމެ 48 އެހީގެ ޓްރަކް ކަމަށެވެ.

ރަފާހް ގެ ހާލަތާއި ގުޅޭގޮތުން ވާހަކަފުޅު ދައްކަވަމުން ޔޫއެންއާރުޑަބްލިއުއޭގެ ތަރުޖަމާނު ލޫއީސް ވޯޓާރިޖް ވިދާޅުވީ، އެހީތެރިކަން ފޯރުކޮށްދިނުމަށްޓަކައި ޣައްޒާގައި އދ ގެ ގިނަ ބަޔަކު ހަރަކާތްތެރިވި ނަމަވެސް ޔަހޫދީން އަޅާފައިވާ ފިޔަވަޅު ތަކުގެ ސަބަބުން  ޣައްޒާގެ ރައްޔިތުންނަށް އެކަށީގެންވާވަރަށް އެހީ ފޯރުކޮށްދެވިފައިނުވާ ކަމަށެވެ.

ޔޫއެންއާރުޑަބްލިއުއޭ އިން ރަފާހްގައި ކާބޯތަކެތި ބެހުން މެދުކަނޑާލިނަމަވެސް، ޑަބްލިއުއެފްޕީ އިން ވަނީ ކާބޯތަކެތި ހުސްވާންދެން ބެހުމުގެ މަސައްކަތް ކުރިއަށް ގެންދާނެ ކަމަށް ބުނެފައެވެ.

ޣައްޒާގެ ގަތުލުއާއްމަށް ހަތްމަސް ވެފައިވާއިރު، އިންސާނީ އެހީތެރިކަމަކީ ޣައްޒާގެ ރައްޔިތުންނަށް އިންތިހާއަށް ބޭނުންޖެހިފައިވާ ކަމެކެވެ. އެހެންނަމަވެސް، އިސްރާއީލުން އަންނަނީ ޣައްޒާއަށް އެހީ ފޯރުކޮށްދިނުމަށް ބޮޑެތި ހުރަސްތަކެއް ކުރިމަތިކުރުވަމުންކަން ފާހަގަކޮށްލަން ޖެހެއެވެ.