13 އަހަރުގެ ކުއްޖަކަށް ޖިންސީ ގޯނާކުރި މައްސަލައެއް ފެންމަތިވެއްޖެއެވެ. 

މިއަދު ފުލުހުން ހާމަކުރެއްވި ގޮތުގައި އުތުރުގެ ރަށެއްގައި 13 އަހަރުގެ ކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެއް މޭ މަހު 19 ވަނަ ދުވަހު ވަނީ ރިޕޯޓުކޮށްފައެވެ.

ފުލުހުން މައުލޫމާތު ދެއްވި ގޮތުގައި މި މައްސަލައާ ގުޅިގެން އަދި މީހަކު ހައްޔަރު ކޮށްފައެއް ނުވެއެވެ. ނަމަވެސް މި މައްސަލަ ފުލުހުން ދަނީ ތަޙްޤީގު ކުރަމުންނެވެ. 

Advertisement

މި ހާދިސާއާ ގުޅިގެން ޢާންމުންގެ މީހަކު މައުލޫމާތު ދިން ގޮތުގައި ކުޑަ ކުއްޖާއަށް ވަނީ ޖިންސީ ގޯނާ ކުރުމުގެ އިތުރުން، މަސްތުވާތަކެތިވެސް ދީފައެވެ. އަދި މި ޢަމަލު ހިންގި ފިރިހެން މީހާ ހައްޔަރު ކުރުމަށް މޭ މަހުގެ 20 ވަނަ ދުވަހުން ފެށިގެން ފުލުހުން މަސައްކަތް ކުރަމުން އަންނަ ކަމަށާއި، އޭނާ ހައްޔަރު ކުރަން ކޯޓު ޢަމުރަކަށް އެދުނު ކަން އެނގުމުން، މި މައްސަލައިގައި ތުހުމަތު ކުރެވޭ މީހާ ފިލާފައިވާކަމަށްވެސް މައުލޫމާތު ލިބެއެވެ.

ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން، ފުލުހުން އެ ކުއްޖާގެ ވަނަވަރު ހާމަކޮށްފައެއް ނުވެއެވެ.

ފުލުހުންގެ މެސެޖުގައި އިތުރަށް ވިދާޅުވެފައިވަނީ ކުޑަކުދިންނާ ގުޅުންހުރި މައްސަލަތަކަކީ ފުލުހުން ވަރަށް ސީރިއަސްކޮށް ބަލަމުންގެންދާ މައްސަލަތަކެއް ކަމަށާ މި ފަދަ މައްސަލަތަކުގެ ތަޙްޤީގު ވަރަށް ސީރިޔަސް ކަމާއެކު ކުރިއަށް ގެންދާނެ ކަމަށެވެ.