ޔަހޫދީ ފައުޖުން ރަފާހް އަށް ދެމުންގެންދާ ހަމަލާތައް ވަގުތުން ހުއްޓާލުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިސްރާއީލަށް ކުރި އަމުރާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މަރުހަބާ ވިދާޅުވެއްޖެއެވެ.

ބައިނަލްއަޤްވާމީ ކޯޓުގެ ނިންމުމަށް ތާޢީދު ކުރައްވައި، ރައީސް ޑރ.މުޢިއްޒު އެކްސް ގައި ކުރެއްވި ޕޯސްޓެއްގައި ވިދާޅުވީ، އިސްރާއީލުން ރަފާހްގައި ހިންގަމުންދާ ލާއިންސާނީ އަމަލުތައް ވަގުތުން ހުއްޓާލުމަށް ކުރި ޙުކުމާއެއްގޮތަށް ބޯލަނބަން ޖެހޭނެ ކަމަށާއި ރަފަޙް ބޯޑަރު ހުޅުވައި އިންސާނީ އެހީ ފޯރުކޮށްދިނުމުގެ ފުރުސަތު ވެސް ފަހިކޮށްދޭން ޖެހޭނެ ކަމަށެވެ.

ރައީސް ޑރ.މުޢިއްޒު ވިދާޅުވީ، އައިސީޖޭއިން ނެރުނު މި އަމުރަކީ ހަމަޖެހުން ޤާއިމުކުރުމަށް އެޅުނު މުހިންމު ފިޔަވަޅަކަށްވި ނަމަވެސް ރާއްޖެ އިން ގަބޫލުކުރާ ގޮތުގައި ފުރިހަމަ ގޮތުގައި ހަމަޖެހުން ޤާއިމުވެގެންދާނީ 1967 ގެ ކުރިން ބޯޑަރު އޮތްގޮތަށް އިރުމަތީ ޤުދުސް ފަލަސްތީނުގެ ވެރިރަށުގެ ގޮތުގައި ގާއިމުވުމުން ކަމަށެވެ.

އިއްޔެ އިސްރާއީލުގެ މައްޗަށް އައިސީޖޭ އިން ކުރި ހުކުމްގައި ބައިނަލްއަގްވާމީ ގާނޫނުގެ ދަށުން ނަސްލު ނައްތާލުމުގެ ގޮތުގައި ބެލެވޭ ކަންކަމަށް އިޝާރާތްކޮށް ނަވާފް ސަލާމް ވަނީ އިސްރާއީލުން ޣައްޒާގައި ހިންގަމުންގާ ގަތުލުއާއްމަކީ ފަލަސްތީނުގެ އާއްމުންނަށް ޖިސްމާނީ އަނިޔާތައް ލިބެމުންދާ ލާއިންސާނީ އަމަލަކަށް ވާއިރު، އިސްރާއީލުން ރަފާހްއަށް ދެމުންގެންދާ އަސްކަރީ ހަމަލާތަކާއި އެނޫންވެސް އެހެން އަމަލުތައް ވަގުތުން ހުއްޓާލުމަށް އަމުރުކޮށްފައެވެ.

ހަމައެއާއިއެކު، އިސްރާއީލުން ހިންގާ މި ގަތުލުއާއްމާއި ގުޅޭ ކަންކަން ތަހުގީގު ކުރުމަށް ހުރަހެއް ނެތި ޣައްޒާއަށް ވަދެވޭނެ ގޮތް ހަދަން ޖެހޭ ކަމަށާއި، އެއްވެސް ހުރަހެއްނެތި އިންސާނީއެހީ ޣައްޒާއަށް ފޯރުކޮށްދެވޭނެ މަގު ފަހިކޮށްދިނުމަށް ވެސް ކޯޓުގެ އަމުރުގައި ވެއެވެ.

މީގެ ކުރިންވެސް ފަލަސްޠީނުގެ މުސްލިމް ރައްޔިތުންގެ ޙައްޤުގައި އިސްރާއީލާ ދެކޮޅަށް ދައުވާ ކުރި ދެކުނު އެފްރިކާއިން ހުށައެޅި މައްސަލައަށް މިފަދައިން އަމުރު ނެރެފައިވަނީ 13 އަޣުލަބިއްޔަތުންނެވެ. އަމުރު ނެރުމާ ދެކޮޅުމަށް ތިބީ ދެ ފަނޑިޔާރެކެވެ.

މިއީ އައިސީޖޭއިން ޣައްޒާގެ ގަތުލުއާއްމާއި ގުޅިގެން އިސްރާއީލުގެ މައްޗަށް ނެރުނު ތިން ވަނަ އަމުރުކަން ފާހަގަކޮށްލަން ޖެހެއެވެ.