ޣައްޒާގެ ދެކުނުގައި އޮންނަ ރަފާހުގައި "ސޭފް ޒޯނެއް" ކަމަށް ކަނޑައަޅާފައިވާ، އާއްމުން ބޯހިޔާވަހިކަން ހޯދަމުންދިޔަ ސަރަހައްދަކަށް ރަހުމެއް ނެތް ޔަހޫދީ ފައުޖުން ހަމަލާދީ، 35 މީހަކު ދިރިތިއްބާ އަންދާލައިފިއެވެ.
ފަލަސްތީނުގެ ސިއްހީ މަސައްކަތްތެރިން ބުނި ގޮތުގައި ވައިގެ މަގުން ޔަހޫދީން ދިން މި ހަމަލާ އަމާޒުކޮށްފައިވަނީ، ޣައްޒާގައި ހިނގަމުންދާ ގަތުލުއާއްމުގެ ސަބަބުން ގެދޮރުގެއްލިފައިވާ އާއްމުން ބޯހިޔާވަހިކަން ހޯދަމުންދިޔަ ޓެންޓް ތަކަކަށް ކަމަށާއި، އެ ސަރަހައްދަކީ މީގެ ކުރިން ޔަހޫދީން ރައްކާތެރި ކަމަށް ކަނޑައަޅާފައިވާ ސަރަހައްދެއް ކަމަށެވެ.
ހަމަލާތަކާއި ގުޅިގެން ޓެންޓްތަކުގައި އަލިފާން ރޯވެފައިވާއިރު، އަލިފާންގަނޑުގެ ތެރޭގައި އެތައް ބަޔަކު ތާށިވެފައިވާކަމަށް ވެސް ކަމާ ބެހޭ ފަރާތްތަކުން މައުލޫމާތުދެއެވެ. މި ހަމަލާގައި ޝަހީދުވި މީހުންގެ ތެރޭގައި ގިނަ އަދަދަކަށް ކުޑަ ކުދިންނާއި އަންހެނުން ހިމެނެއެވެ.
ހަމައެއާއިއެކު، ލިބުނު ބޮޑެތި ޒަހަމްތަކާއި ދިރިތިއްބާ އަންދާލި އާއްމުންނާއި އެކު މި ހަމަލާގައި ޝަހީދުވި މީހުންގެ އަދަދު ވަނީ 50 އަށް އަރާފައެވެ.
އިސްރާއީލުގެ ވައިގެ ހަމަލާތަކުގައި ޓެންޓްތައް ވަނީ އަނދާފައި. ޓެންޓް ތަކާއި އެކު މީހުންގެ ހަށިތައް ވެސް ދަނީ ވިރެމުން."
ހަމަލާ އާއި ގުޅިގެން ފަރުވާދިނުމަށް ރަފާހުގައި ހުރި ކުވައިތީ ހޮސްޕިޓަލަށް ގެނައި މީހަކު ބުންޏެވެ.
ހައްދުފަހަނަ އަޅާފައިވާ އިސްރާއީލުން ރަފާހްގައި އާއްމުން ބޯހިޔާވަހިކަން ހޯދަމުން ދިޔަ ސަރަހައްދަށް އަމާޒުކޮށް ހަމަލާދީފައިވަނީ، މީގެ ދެ ދުވަސް ކުރިން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން 2.3 މިލިއަން މީހުން ބޯހިޔާވަހިކަން ހޯދަމުންދާ ރަފާހްގައި ޔަހޫދީ ފައުޖުން ހިންގަމުންދާ ގަތުލުއާއްމު ހުއްޓާލުމަށް އަމުރުކޮށްފައިވަނިކޮށެވެ.
Advertisement
This content is created and paid for by advertisers and does not involve Voice Journalists
