އިންޑިއާގެ ހިލޭ އެހީގެ ދަށުން ކުރިއަށް ގެންދަން ރާވާފައި ހުރި މަޝްރޫޢުތަކާ ގުޅޭގޮތުން އިންޑިއާއާއެކު ސަރުކާރުން މަޝްވަރާ ބައްދަލުވުމެއް ބާއްވައިފިއެވެ.

އިންޑިޔާ ސަރުކާރުގެ ހިލޭ އެހީގައި ރާއްޖޭގައި ކުރިއަށް ގެންދަން ރާވާފައިވާ މަޝްރޫއުތަަށް މުރާޖާ ކުރުމަށް އިއްޔެ ބޭއްވި މި ބައްދަލުވުން ކުރިއަށް ގެންގޮސްފައިވަނީ ޚާރިޖީ ވުޒާރާ އާއި އިންޑިއާ އެބްސީން ގުޅިގެންނެވެ.

އެ ބައްދަލުވުމުގައި އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު މުނޫ މަހާވަރު ވެސް ބައިވެރިވެވަޑައިގެންފައިވެއެވެ. ރާއްޖޭގެ ޚާރިޖީ ވުޒާރާގެ ފަރާތުން މި ބައްދަލުވުމުގައި ބައިވެރިވަޑައިގެންނެވީ އެމްބެސެޑަރ އަހުމަދު ނަސީރެވެ.

ނިމިދިޔަ ސަރުކާރުގައި ވެފައިވާ އެއްބަސްވުންތަކުގެ ދަށުން، އިންޑިއާގެ ހިލޭ އެހީގައި 65 މަޝްރޫޢެއް ކުރިއަށް ގެންދިއުމަށް ނިންމާފައިވާއިރު އެ މަޝްރޫޢުތަކުގެ ޖުމްލަ އަގަކީ 360 މިލިއަން ރުފިޔާއެވެ.

ނިމިދިޔަ ރައީސް އިބްރާހީމް މުޙައްމަދު ޞާލިޙް ގެ ސަރުކާރުގައި، އިންޑިއާގެ ހިލޭ އެހީގައި ގިނަ މަސައްކަތްތަކެއް ވަނީ ކޮށްދީފައެވެ. އެގޮތުން ހިލޭ އެހީގެ ދަށުން 18 ޕްރޮޖެކްޓެއް ނިންމައި ސަރުކާރާ ހަވާލުކޮށްފައިވާކަން ފާހަގަކޮށްލެވެއެވެ.