ވިހިވަނަ ރައްޔިތުންގެ މަޖިލީހުގެ ރައީސަކަށް ފޮނަދޫ ދާއިރާގެ މެންބަރު އަބްދުއްރަޙީމް އަބްދުالله އިންތިޚާބުކޮށްފިއެވެ.

އަބްދުއްރަހީމްގެ ނަން މަޖިލީހުގެ ރައީސްކަމަށް ދިއްގަރު ދާއިރާގެ މެންބަރު އަހުމަދު ނާޒިމް ހުށަހެޅުއްވިއިރު، އެ ހުށަހެޅުމަށް އިނގުރައިދޫ ދާއިރާގެ މެންބަރު އިބްރާހިމް ފަލާހް ވަނީ ތާއިދު ކުރައްވާފަ އެވެ.

އަބްދުއްރަހީމްގެ އިތުރުން ދެން މަޖިލީހުގެ ރައީސް ކަމަށް ނަން ހުށަހެޅުއްވީ އިދިކޮޅު އެމްޑީޕީގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލްގެ ނަންފުޅެވެ. ވައިކަރަދޫ ދާއިރާގެ މެންބަރު ހުސައިން ޒިޔާދުގެ މި ހުށަހެޅުއްވުމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ތާއީދު ކުރެއްވިއެވެ.

Advertisement

އެތަނުން ރައީސް ކަމުގެ މަގާމުގައި އިންނާނެ ބޭފުޅަކު ކަނޑައެޅުމަށް ނެގުނު ސިއްރު ވޯޓުގެ ނަތީޖާ ދައްކާ ގޮތުން މަޖިލީހުގެ ރައީސް އަކީ އަބްދުއްރަހީމެވެ. އޭނާ ރައްޔިތުންގެ މަޖިލީހުގެ ރައީސްކަމަށް ހޮވާފައިވަނީ 71 މެމްބަރުންގެ ވޯޓާއި އެކުއެވެ. މަޖިލީހުގެ ރައީސްކަމަށް ނާޒިލް ހޮވުމަށް 14 މެންބަރަކު ވޯޓު ދެއްވާފައިވާއިރު ބާތިލް 7 ވޯޓު ހިމެނެއެވެ.

ވިހިވަނަ ރައްޔިތުންގެ މަޖިލީހުގެ ނައިބު ރައީސް ކަމަށް މަޖިލީހުގެ ސުޕަ މެޖޯރިޓީ އޮތް ޕީއެންސީގެ ފަރާތުން ދިއްގަރު ދާއިރާގެ މެންބަރު އަހުމަދު ނާޒިމްގެ ނަން ފޮނަދޫ ދާއިރާގެ މެންބަރު އަބްދުއްރަހީމް ހުށަހެޅުއްވިއިރު، މި ހުށަހެޅުމަށް ބާރަށު ދާއިރާގެ މެންބަރު އިބްރާހިމް ޝުޖާއު ވަނީ ތާއިދު ކުރައްވާފަ އެވެ.

ހަމައެއާއިއެކު، އިދިކޮޅު އެމްޑީޕީގެ ފަރާތުން ނައިބު ރައީސަކަށް ހުށަހަޅުއްވާފައިވަނީ މަރަދޫ ދައިރާގެ މެންބަރު އަހުމަދު ދީދީގެ ނަމެވެ. ވައިކަރަދޫ ދާއިރާގެ މެންބަރު ހުސައިން ޒިޔާދުގެ މި ހުށަހެޅުއްވުމަށް މާވަށު ދާއިރާގެ މެންބަރު އަހުމަދު ޝާކިރު ތާއީދު ކުރެއްވިއެވެ.

މިއަދު ހެނދުނު 9 ޖެހިއިރު، 20 ވަނަ ރައްޔިތުންގެ މަޖިލީހަށް 93ދާއިރާއަކުން އިންތިހާބުވެވަޑައިގެންނެވި މެމްބަރުން ހުވާކުރައްވާފައިވާއިރު، އޭގެ ތެރެއިން 75 މެންބަރުންނަކީ ވެރިކަން ކުރާ ކޯލިޝަންގެ މައި ޕާޓީ ޕީއެންސީއަށް ނިސްބަތްވާ މެންބަރުންނެވެ.

މިފަހަރުގެ މަޖިލީހުގައި ސަރުކާރު ކޯލިޝަންގައި ހިމެނޭ އެމްއެންޕީގެ އެއް މެންބަރު، އެމްޑީއޭގެ ދެ މެންބަރުން އަދި ޖޭޕީގެ އެއް މެންބަރު ހިމެނޭއިރު، އިދިކޮޅު މައި ޕާޓީ އެމްޑީޕީއަށް ނިސްބަތްވާ 12 މެންބަރުންނާއި އަމިއްލަ ގޮތުން ވާދަކުރެއްވި 2 މެމްބަރަކު މިފަހަރުގެ މަޖިލީހުގައި ތިއްބަވާނެއެވެ.