މިއަދު ހުވާ ކުރި އާ މަޖިލީހުގެގަވާއިދު އެކުލަވައިލައި ފާސްކުރެވެންދެން، ނިމިދިޔަ 19 ވަނަ މަޖިލީހުގައި އަމަލުކުރަމުން އައި ގަވާއިދަށް އަމަލުކުރުމަށް ފާސްކޮށްފިއެވެ.

 މިއަދުގެ ޖަލްސާގައި އިނގުރައިދޫ ދާއިރާގެ ޕީއެންސީ މެމްބަރު އިބްރާހީމް ފަލާހް މިފަދައިން ހުށަހެޅުއްވީ މަޖިލީހުގެ މަސައްކަތް މެދު ނުކެނޑި ކުރިއަށް ގެންދިއުމަށް ޓަކައިއެވެ.

ފަލާހް ގެ މި ހުށަހެޅުއްވުމަށް މައްޗަންގޮޅި އުތުރު ދާއިރާގެ މެމްބަރު އިބްރާހީމް މުހައްމަދު ތާއީދު ކުރެއްވިއިރު، މި ހުށަހެޅުން ފާސްކޮށްފައިވަނީ 90 މެމްބަރުންގެ ވޯޓުންނެވެ.

މި ހުށަހެޅުމުގައި އާ ގަވައިދު އެކުލަވައިލަން، މަޖިލީހުގެ އާއްމު ކޮމިޓީއާ ހަވާލުކޮށް، އެ މަސައްކަތް ނިންމާނެ ސުންގަޑިއެއްގެ ގޮތުގައި އަންނަ ޖޫން މަހުގެ 26 ވަނަ ދުވަސް ވަނީ ކަނޑައަޅާފައެވެ.

ރައްޔިތުންގެ މަޖިލީހަށް 93 ދާއިރާއަކުން އިންތިހާބުވެވަޑައިގެންނެވި މެމްބަރުން ހުވާކުރައްވާފައިވާއިރު، އޭގެ ތެރެއިން 75 ދާއިރާ ކާމިޔާބުކޮށް، ވެރިކަން ކުރާ ޕީއެންސީ އިން ވަނީ ސުޕަމެޖޯރިޓީ ނަގާފައެވެ.

މިފަހަރުގެ މަޖިލީހުގައި ސަރުކާރު ކޯލިޝަންގައި ހިމެނޭ އެމްއެންޕީގެ އެއް މެންބަރު، އެމްޑީއޭގެ ދެ މެންބަރުން އަދި ޖޭޕީގެ އެއް މެންބަރު ހިމެނޭއިރު، އިދިކޮޅު މައި ޕާޓީ އެމްޑީޕީއަށް ނިސްބަތްވާ 12 މެންބަރުންނާއި އަމިއްލަ ގޮތުން ވާދަކުރެއްވި 2 މެމްބަރަކު މިފަހަރުގެ މަޖިލީހުގައި ތިއްބަވާނެއެވެ.