އަޔަލެންޑް، ނޯވޭ އަދި ސްޕެއިން އިން ފަލަސްތީނުގެ ދައުލަތް ރަސްމީކޮށް ބަލައިގެންފިއެވެ.

މި ތިން ގައުމުން ފަލަސްތީނަކީ ދައުލަތެއްގެ ގޮތުގައި ރަސްމީކޮށް ބަލައިގަންނާނެ ކަމަށް އިއުލާނުކޮށްފައިވަނީ މި މަހުގެ 22 ވަނަ ދުވަހު ތިން ގައުމުގެ ބޮޑުވަޒީރުން ބޭއްވި ބައްދަލުވުމެއްގައިއެވެ.

މިކަމާއި ގުޅިގެން މި ތިން ގައުމުން ބުނީ، މި ނިންމުމާއިއެކު، އިސްރާއީލުން ޣައްޒާގައި ހިންގަމުންދާ ގަތުލުއާއްމު ހުއްޓާލުމާއި ގުޅޭގޮތުން ކުރަމުންދާ މަސައްކަތް ކުރިއަށް ވުރެ އަވަސް ކުރާނެ ކަަމަށާއި، އެމީހުންގެ މި ނިންމުމާއި އެއްގޮތަށް ޔޫރަޕިއަން ޔޫނިއަންގެ އެހެން ގައުމުތަކުން ވެސް ފަލަސްތީނަކީ ވަކި ދައުލަތެއްގެ ގޮތުގައި ބަލައިގަންނާނެ ކަމަށް އުންމީދު ކުރާ ކަމަށެވެ.

ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވިދާޅުވީ، ސްޕެއިން އިން ފަލަސްތީނުގެ ދައުލަތް ބަލައިގެންފައިވަނީ ޣައްޒާ އާއި ވެސްޓް ބޭންކް ހިމެނޭހެން، އިރުމަތީ ގުދުސް އަކީ އެގައުމުގެ ވެރިރަށް ކަމުގައި ނިންމައިގެން ކަމަށެވެ. އަދި 1967 ގެ ކުރިން ބޯޑަރުތައް އޮތް ގޮތަށް ގެނެސްފައިވާ އެއްވެސް ބަދަލެއް ބަލައިނުގަންނަ ކަމަށް ވެސް ސަންޗޭޒް ވިދާޅުވިއެވެ.

މި ނިންމުމާއި ގުޅިގެން އަޔަލޭންޑްގެ ޑިޕާޓްމަންޓް އޮފް ފޮރިން އެފެއާޒް އިން ވަނީ ހުޅަނގު އައްސޭރީގައި ހުންނަ އެގައުމުގެ ރެޕްރެޒެންޓޭޓިވް އޮފީސް އެމްބަސީ އަކަށް ބަދަލުކުރުމަށް ނިންމައި، ސަފީރަކު އައްޔަނުކޮށް، އަޔަލޭންޑްގައި ހުންނަ ފަލަސްތީނުގެ މިޝަންގެ ދަރަޖަ އެމްބަސީއަކަށް ބަދަލުކުރަން ނިންމާފައިވާކަން އިއުލާނުކޮށްފައެވެ.

ފަލަސްތީނުން މި ނިންމުމަށް މަރުހަބާ ކިޔާފައިވާއިރު، މި ތިން ގައުމު ހިމެނޭ ޔޫރަޕިއަން ޔޫނިއަން ގެ 27 ގައުމު ތެރެއިން 11 ގައުމަކުން ފަލަސްތީނުގެ ދައުލަތް ބަލައިގެންފައިވާއިރު، އެ ޔޫނިއަން ގައި ހިމެނޭ ސްލޮވޭނިއާ އާއި މަލްޓާ އިން ވެސް ފަލަސްތީނުގެ ދައުލަތް މި ހަފްތާގެ ބުރާސްފަތި ދުވަހު ރަސްމީކޮށް ބަލައިގަންނާނެއެވެ.

ހަމައެއާއިއެކު، އދ ގެ 193 މެމްބަރު ގައުމުގެ ތެރެއިން 143 ގައުމަކުން ވެސް ފަލަސްތީނުގެ ދައުލަތް ރަސްމީކޮށް ބަލައިގެންފައިވާކަން ފާހަގަކޮށްލަން ޖެހެއެވެ.