ކުރިއަށް އޮތް އެމެރިކާގެ ރިޔާސީ އިންތިހާބުގައި އެގައުމުގެ ރިޕަބްލިކަން ޕާޓީގެ ފަރާތުން ވާދަކުރާ ރިޔާސީ ކެންޑިޑޭޓް ނިކީ ހާލީ އިސްރާއީލަށް ކުރި ދަތުރުގައި ޔަހޫދީން ޣައްޒާ އަށް އަޅަން ތައްޔާރު ކޮށްފައިވާ ބޮން ތަކެއްގައި މުސްލިމުންގެ ދުވަސް ދުއްވާލުމަށް ލިޔެ ސޮއިކޮށްފިއެވެ.

ސައުތު ކެރޮލައިނާގެ ކުރީގެ ގަވަރުނަރު މަގާމުގައި ހުރި ހާލީ، އޭނާ ހައްދުފަހަނައަޅާފައިވާ ޔަހޫދީން ކުރާ ސަޕޯޓު ދެއްކުމުގެ ގޮތުން ކުރި މި އަމަލުގައި، މީގެ ކުރިން އިސްރާއީލުން އދ އަށް ކަނޑައަޅާފައި ހުންނަ ސަފީރުގެ މަގާމު އަދާކުރި އަދި އިސްރާއީލުގެ ލާއިންސާނީ ބޮޑުވަޒީރު ނަތަންޔާހޫގެ ޕާޓީގެ މެމްބަރެއް ކަމަށްވާ ޑެނީ ޑެނަން ވެސް ބައިވެރިވިއެވެ.

މިކަމަށް ފަހު ހާލީ ނޫސްވެރިންނާއި ވާހަކަދެއްކިއިރުވެސް، އޭނާ ވަނީ ބައިޑަން ގެ ސަރުކާރުން އިސްރާއީލަށް ހަތިޔާރު ފޯރުކޮށްދިނުން މެދުކަނޑާލުމަށް ނިންމުމާއި ގުޅިގެން އެކަމަށްވެސް ފާޑުކިޔާފައެވެ. އަދި ޔަހޫދީންގެ ލާއިންސާނީ އެތައް އަމަލަކާއި ކުރިމަތިލާން ޖެހިފައިވާ ޣައްޒާގެ މުސްލިމުންނަކީ އެމެރިކާގެ ވެސް ދުޝްމަނުން ކަމަށް ސިފަކޮށް، ޔަހޫދީން ބޭނުންވާ ހުރިހާ ވަސީލަތެއް އެމެރިކާއިން ފޯރުކޮށްދިނުމަށް ވެސް އޭނާ ގޮވާލިއެވެ.

ދާދި ފަހުން ޔަހޫދީ ފައުޖުން ވަނީ ޣައްޒާގެ ދެކުނުގައި އޮންނަ ރަފާހުގައި "ސޭފް ޒޯނެއް" ކަމަށް ކަނޑައަޅާފައިވާ، އާއްމުން ބޯހިޔާވަހިކަން ހޯދަމުންދިޔަ ސަރަހައްދަކަށް އެއްވެސް ރަހުމެއް ނެތި ހަމަލާތަކެއް އަމާޒުކޮށްފައެވެ. 

މި ހަމަލާތަކުގައި އެ ސަރަހައްދުގައި ހުރި ޓެންޓް ތަކެއްގައި އަލިފާން ރޯވެ، 35 މީހަކު ދިރިހުއްޓާ އަދައި، ޝަހީދުވިއިރު، ފަލަސްތީނުގެ ސިއްހީ މަސައްކަތްތެރިން ބުނި ގޮތުގައި ވައިގެ މަގުން ޔަހޫދީން ދިން މި ހަމަލާ އަމާޒުކޮށްފައިވަނީ، ޣައްޒާގައި ހިނގަމުންދާ ގަތުލުއާއްމުގެ ސަބަބުން ގެދޮރުގެއްލިފައިވާ އާއްމުން ބޯހިޔާވަހިކަން ހޯދަމުންދިޔަ ޓެންޓް ތަކަކަށް ކަމަށާއި، އެ ސަރަހައްދަކީ މީގެ ކުރިން ޔަހޫދީން ރައްކާތެރި ކަމަށް ކަނޑައަޅާފައިވާ ސަރަހައްދެއް ކަމަށެވެ.

މިހަމަލާގައި ގިނަ އަދަދަކަށް ކުޑަކުދިންނާއި އަންހެނުން ޝަހީދުވެފައިވާއިރު، ޔަހޫދީންގެ ޣައިރު ގާނޫނީ ދައުލަތްކަމަށްވާ އިސްރާއީލުން ބުނި ގޮތުގައި އެއީ "މިސްޓޭކެއް" ކަމަށާއި އެކަންތައް ތަހުގީގު ކުރަމުން އަންނަ ކަމަށް ބުނެފައިވާއިރު، އެމެރިކާއިން ވަނީ ޔަހޫދީ ފައުޖުން ރަފާހް ގައި ތިބި އެއްވެސް ކުށެއްނެތް މުސްލިމުންނަށް އަމާޒުކޮށް ދިން މި ހަމަލާ އެމެރިކާއިގެ ރައީސް ޖޯ ބައިޑެންގެ ރަތް ރޮނގު ހުރަސް ނުކުރާ ކަމަށް ބުނެފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީން ޣައްޒާ އަށް ހުއްޓުމެއްނެތި ދެމުންގެންދާ ލާއިންސާނީ ހަމަލާތައް ހުއްޓާލުމަށް އދ އާއި ބައިނަލްއަގުވާމީ ކޯޓުތަކާއި އެނޫންވެސް މަތީ ފަންތީގެ ޖަމިއްޔާ ތަކާއި ގައުމުތަކުން ތަކުރާރުކޮށް ގޮވާލަމުން އަންނައިރު، އިސްރާއީލުން އެއިން އެއްވެސް ފަރާތަކަށް ބޯލަބާފައެއްނުވެއެވެ.

ޣައްޒާއަށް އިންސާނީ އެހީ ވެއްދުމަށް ވެސް ޔަހޫދީން ދަތި ކުރުމުގެ އަޅާފައިވާއިރު، ހަމަލާތަކުގައި ޝަހީދުވި މީހުންގެ އަދަދު ވަނީ 36,171 އަށް އަރާފައެވެ.