ފުލުހުންގެ އަސާސީ ތަމްރީން ކޯސް 164 ފުލުހުން ފުރިހަމަކޮށްފިއެވެ.

ދިވެހި ފުލުހުންގެ ހިދުމަތުން ބުނީ ފުލުހުންގެ 36 ވަނަ އަސާސީ ތަމްރީނު ކޯހުގައި 198 ފުލުހުން ބައިވެރިވެ 164 ފުލުހުން ފާސްވެ ކާމިޔާބުކަމާއެކު ކޯސް ފުރިހަމަކޮށްފައިވާކަމަށާއި، އޭގެ ތެރޭގައި ހިމެނެނީ 36 އަންހެން ފުލުހުންނާއި 128 ފިރިހެން ފުލުހުން ކަމަށެވެ.

މި ކޯހަކީ ދިވެހިރާއްޖޭގެ ގާނޫނު އަސާސީން ދިވެހި ފުލުހުންގެ ޚިދުމަތަށް މަތިކޮށްފައިވާ ގާނޫނީ މަސްއޫލިއްޔަތު އަދާކުރުމަށާއި، ފުލުހެއްގެ މަސްއޫލިއްޔަތު އެންމެ އެދެވޭގޮތުގައި އަދާކުރުމަށް ބޭނުންވާ އަސާސީ ތަމްރީނާއި މުހިންމު ހުނަރާއި އިލްމު އަދި މައުލޫމާތު އުނގަންނައިދިނުމަށް ފަރުމާކޮށްގެން ކުރިއަށް ގެންދިޔަ ކޯހެއް ކަމަށް ފުލުހުން މައުލޫމާތުދެއެވެ.

މި ކޯހުގައި ތަމްރީނުވި ފުލުހުންނަށް  ގާނޫނާއި، ހިއުމަން ރައިޓްސް އާއި ދީނީ ވާޖިބުތަކާއި އިސްލާމީ ރިވެތި އަހުލާގު އަދި ދިވެހި ފުލުހުންގެ ޚިދުމަތުގެ ކޯޑް އޮފް ކޮންޑަކްޓާއި ކޯޑް އޮފް އެތިކްސް ފަދަ ބައިތަކާއެކު ތަމްރީނުތައް ވަނީ ކުރިއަށް ގެންގޮސްފައިއެވެ.

ފުލުހުންގެ 36 ވަނަ އަސާސީ ތަމްރީނު ކޯސް ނިންމުމުގެ ރަސްމިއްޔާތު އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގައި ރޭގައި ބާއްވާފައިވާއިރު، ރަސްމިއްޔާތު ޝަރަފުވެރި ކޮށްދެއްވީ ދާޚިލީ ސަލާމަތާއި ފަންނިއްޔަތާ ބެހޭ ވަޒީރު އަލީ އިޙްސާންއެވެ.

މި ރަސްމިއްޔާތުގައި ކޯހުގެ ވަނަތަކަށް ދިޔަ ދަރިވަރުންނަށް ވަނީ އެވޯޑު ވެސް ހަވާލުކޮށްފައެވެ. ކޯހުގެ ވަނަތަކަށް ދިޔަ ފުލުހުންނަކީ:

1) ހުރިހާ ގޮތަކުން އެންމެ މޮޅު ދަރިވަރު -  ޕޮލިސް ސަރޖަންޓް އަހްމަދު ނިހާދު

2) ކޯހުން ދެވަނަ ދަރިވަރު - ޕޮލިސް ކޮންސްޓަބަލް އާލިމަ މުޙައްމަދު

3) ކޯހުން ތިން ވަނަ ދަރިވަރު - ޕޮލިސް ކޮންސްޓަބަލް މުއީން މުޙައްމަދު

4) އިންޑޯ މާއްދާތަކުން އެއްވަނަ ދަރިވަރު -  ޕޮލިސް ކޮންސްޓަބަލް މުޙައްމަދު އަމްހަރް އާރިފް

5) އިންޑޯ މާއްދާތަކުން ދެވަނަ ދަރިވަރު - ޕޮލިސް ސަރޖަންޓް އަޙްމަދު ނިހާދު

6) އިންޑޯ މާއްދާތަކުން ތިން ވަނަ ދަރިވަރު - ޕޮލިސް ކޮންސްޓަބަލް ހަސަން އަނަސް ނާފިޒް

7) އައުޓްޑޯ މާއްދާތަކުން އެއްވަނަ ދަރިވަރު -  ޕޮލިސް ސަރޖަންޓް އަޙްމަދު ނިހާދު

8) އައުޓްޑޯ މާއްދާތަކުން ދެވަނަ ދަރިވަރު - ޕޮލިސް ކޮންސްޓަބަލް މާޝާ ރަޝީދު

9) އައުޓްޑޯ މާއްދާތަކުން ތިންވަނަ ދަރިވަރު - ޕޮލިސް ކޮންސްޓަބަލް އާއިޝަތު ރަވީނާ

10) އެންމެ މޮޅު ސްކޮޑް - ބީފާނު ސްކޮޑް

މި އަސާސީ ތަމްރީނު ކޯހަކީ އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގައި މި އަހަރުގެ ޖަނަވަރީ 24 އިން މެއި 23 އަށް ކުރިއަށް ގެންދިޔަ ކޯހެކެވެ.