މެދުކެނޑުމެއްނެތި 20 ދުވަހު ހަމަލާދިނުމަށްފަހު، ޔަހޫދީ ފައުޖު ޣައްޒާގެ އުތުރުގައި އޮންނަ ޖަބަލިއާއިން ފައިބައިފިއެވެ.

ޣައްޒާގެ އެންމެ ބޮޑު ރެފިއުޖީ ކޭމްޕް ހިމެނޭ ޖަބަލިއާ އަކީ 100,000 މީހުން ބޯހިޔާވަހިކަން ހޯދަމުންދިޔަ ސަރަހައްދަކަށް ވާއިރު، ޔަހޫދީންގެ ހަމަލާތަކުގެ ސަބަބުން އެ ސަރަހައްދު ވަނީ ފާހަގަނުކުރެވޭ ވަރަށް ސުންނާފަތިވެ، ބޮޑެތި ގެއްލުންތަކެއް ލިބިފައެވެ.

ފަލަސްތީނުގެ ރެޑް ކްރެސެންޓުން މައުލޫމާތުދޭ ގޮތުގައި، ޔަހޫދީ ފައުޖު ފޭބިފަހުން، ޖަބަލިއާގެ އުތުރުގައި އޮންނަ ބައިތު ލަޙްޔާ އިން ޝަހީދުވެފައިވާ އެތައް ބައެއްގެ ހަށިތައް ވަނީ ފެނިފައެވެ. ރެޑް ކްރެސެންޓުން ބުނީ ބޭނުންވާ ވަސީލަތްތައް ލިބެން ނެތުމުން ބިމާއި ހަމަވެފައިވާ އިމާރާތްތަކުގެ ދަށުން އެ ހަށިތައް ނެގުމުގައި ގޮންޖެހުންތަކަކާއި ކުރިމަތިލާން ޖެހިފައިވާ ކަމަށެވެ.

މިދަތިތަކުގެ ސަބަބުން ޝަހީދުވެފައިވާ ހަށިތައް ނެގުމުގައި ލަސްވެގެން ދިޔުމަކީ ބަލިތައް ފެތުރުމަށް އޮތް ވަރަށް ބޮޑު ފުރުސަތެއްކަން ފާހަގަކޮށް، ފަލަސްތީނުގެ ރެޑް ކްރެސެންޓުން ވަނީ ކަންބޮޑުވުން ފާޅުކޮށްފައެވެ.

ޔަހޫދީ ފައުޖު ޖަބަލިއާ ދޫކޮށް ދިޔުމާއި އެކު، އެ ސަރަހައްދުގައި ތިބި އާއްމުން ވަނީ ޖަބަލިއާގައި ޔަހޫދީން ހިންގި ލާއިންސާނީ ހަމަލާތަކުގެ ސަބަބުން ޝަހީދުވި މީހުންގެ ހަށިތައް ހޯދުމުގެ މަސައްކަތުގެ އިތުރުން، އެ ސަރަހައްދު ސާފުކުރަން ފަށާފައެވެ.

ޖަބަލިއާގައި ހުރި ހޮސްޕިޓަލުތަކާއި ސްކޫލް ތަކާއި އެހެނިހެން މުހިންމު ތަންތަން ހިމެނޭހެން އެ ސަރަހައްދުގައި ހުރި އިމާރާތްތަކުގެ %70 ވަނީ ޔަހޫދީންގެ ހަމަލާތަކުގެ ސަބަބުން ބިމާއި ހަމަވެފައެވެ. އެގޮތުން އަލް ޖަޒީރާއިން އިން ރިޕޯޓް ކުރާ ގޮތުގައި ޖަބަލިއާގައި ހުރި 1,0000 ގެއެއް ޔަހޫދީ ފައުޖުން ހަލާކުކޮށްލިއިރު، އެމީހުން ވަނީ އާއްމުން ބޯހިޔާވަހިކަން ހޯދަމުން ދިޔަ އެތަކެއް އިމާރާތްކެއްގައި އަލިފާން ރޯކޮށް، އަންދާލާފައެވެ.

ޔަހޫދީ ފައުޖުން ޖަބަލިއާ އިން ފޭބިއިރު، ޣައްޒާގެ ދެކުނުގައި އޮންނަ ރަފާޙް ގައި އެމީހުން ހިންގާ ގަތުލުއާއްމު ހުއްޓާލާފައެއް ނުވެއެވެ. އެ ސަރަހައްދުގައި ތިބި އާއްމުން ބޯހިޔާވަހިކަމުން މަހުރޫމްވެފައިވާއިރު، މުޅި ޣައްޒާވެސް އިންސާނީ އެހީއަށް އިންތިހާއަށް ބޭނުންވެފައިވާކަން ފާހަގަކޮށްލަން ޖެހެއެވެ.