ޔަހޫދީންގެ ޣައިރު ގާނޫނީ ދައުލަތްކަމަށްވާ އިސްރާއީލުން ގަތުލުއާއްމު ހުއްޓާލަން ބޭނުންވާކަމަށް ބުނެ, އެކަމާއި ގުޅޭ މަގުޗާޓެއް ހާމަކޮށްފިއެވެ.

މިކަން ހާމަކޮށްފައިވަނީ އިސްރާއީލާއިއެކު ބޭއްވި ބައްދަލުވުމަކަށް ފަހު އެމެރިކާގެ ރައީސް ޖޯ ބައިޑެންއެވެ. މި މަގުޗާޓް ވަނީ 3 ފިޔަވައްސަކަށް ބަހާލާފައެވެ.

މަގު ޗާޓުގެ 3 ފިޔަވައްސަކީ: 

ފުރަތަމަ ފިޔަވަހި - 6 ހަފްތާއަށް ހަނގުރާމަ މެދުކަނޑާލުމާއި އެކު، މީހުން ދިރިއުޅެމުންދާ ހުރިހާ ސަރަހައްދަކުން ޔަހޫދީ ފައުޖުން ފައިބައިގެންދާން ޖެހޭނެއެވެ. އަދި ހަމާސް އިން ހައްޔަރު ކުރި ޔަހޫދީންނާއި، ޔަހޫދީ ސިފައިން ހައްޔަރު ކުރި ފަލަސްތީނުގެ އާއްމުން ދޫކޮށްލުމާއި އެކު ދުވާލަކު 600 އިންސާނީ އެހީގެ ޓްރަކް ޣައްޒާ އަށް ވަނުމަށް މަގުފަހި ކުރަން ޖެހޭނެއެވެ.

ދެވަނަ ފިޔަވަހި - ހަމާސް އިން ހައްޔަރު ކުރި ޔަހޫދީ ސިފައިންނާއި، ޔަހޫދީ ފައުޖުން ރަހީނު ކުރި ހަމާސް ގެ މުޖާހިދުން ދޫކޮށްލުމާއިއެކު، ޔަހޫދީ ފައުޖު ޣައްޒާ އިން ފައިބައި، ހަނގުރާމަ ހުއްޓާލުމާއި ގުޅޭ މަޝްވަރާތައް ފަށަން ޖެހޭނެއެވެ.

ތިންވަނަ ފިޔަވަހި - ޣައްޒާގެ އާއްމުންނަށް އެހީ ފޯރުކޮށްދިނުމާއި ޣައްޒާ އަލުން އާރާސްތުކުރުމުގެ މަސައްކަތް ފަށަން ޖެހޭނެއެވެ.

މިކަމާއި ގުޅިގެން ހަމާސް އިން ބުނީ، މި މަގުޗާޓު ދިރާސާ ކުރަމުންދާ ކަމަށާއި، ދެމެހެއްޓެނިވި ގޮތެއްގައި، ދާއިމީކޮށް ހަނގުރާމަ ހުއްޓާލުމާއި ގުޅޭ މަޝްވަރާތައް ކުރުމަށް ތައްޔާރު ކަމަށެވެ. އޭގެތެރޭގައި ޔަހޫދީ ފައުޖު އެއްކޮށް ޣައްޒާއިން ފައިބައިގެން ދިޔުމާއި، ގަތުލުއާއްމާއި ގުޅިގެން ގެދޮރުދޫކޮށް ދާން ޖެހުނު މީހުން އަނބުރާ އެމީހުންގެ ގެތަކަށް އައުމަށް މަގު ފަހިކޮށްދިނުމާއި، އިސްރާއީލުން ރަހީނުކުރި މުޖާހިދުންނާއި އާއްމުން ދޫކޮށްލާނެ ކަމަށް އެއްބަސްވާނަމަ، ހަމާސް އިން ހައްޔަރުކުރި ޔަހޫދީން ދޫކޮށްލުން ހިމެނެއެވެ.

ބައިޑެން އިސްރާއީލާއި އެއްކޮޅަށް ގެންގުޅޭ ސިޔާސަތުތަކުގެ ސަބަބުން އޭނާ އަށް ފާޑުކިޔުންތައް އަމާޒުވެފައިވާ ދަނޑިވަޅެއްގައި މި މަގުޗާޓު ހިއްސާ ކުރި އިރު، ޖަބަލިއާ ގައި ހަރަކާތްތެރިވަމުންދިޔަ ޔަހޫދީ ފައުޖު ވަނީ މުޅި އެސަރަހައްދު ސުންނާފަތިކުރުމަށް ފަހު، ފައިބައިގެން ގޮސްފައެވެ.

ޔަހޫދީން ޖަބަލިއާއިން ފޭބި ނަމަވެސް، ޣައްޒާގެ ދެކުނުގައި އޮންނަ ރަފާހްގައި ހިންގަމުންދާ ގަތުލުއާއްމު ހުއްޓާލާފައިނުވާއިރު، އެ ސަރަހައްދަށް ދެމުންއަންނަ ލާއިންސާނީ ހަމަލާތައް ޔަހޫދީ ފައުޖުން އިތުރަށް ވަރުގަދަ ކޮށްފައިވާކަން ފާހަގަކޮށްލަން ޖެހެއެވެ.