އަވައްޓެރި އިންޑިއާގެ އުތުރާއި އިރުމައްޗަށް އިންތިހާއަށް ހޫނު ގަދަވެ، ހީޓްސްޓްރޯކް ޖެހުމާއި ގުޅިގެން 50 މީހުން މަރުވެއްޖެއެވެ.

ހޫނު މޫސުމާއި ގުޅިގެން ވަމުންދާ ހޫނުގައި، އެ ސަރަހައްދުގައި ހިމެނޭ ސިޓީތަކުގެ ފިނިހޫނުމިން ވަނީ 50 ޑިގްރީއަށްވުރެ ވެސް މައްޗަށް އަރާފައެވެ. އެގޮތުން މިހާތަނަށް އެ ގައުމުގައި ފިނި ހޫނުމިން އެންމެ މައްޗަށް ގޮސްފައިވަނީ މި އަހަރު ކަމަށް ރެކޯޑްކޮށްފައިވާއިރު، އިންޑިއާގެ ވެރިކަން ކުރާ ރަށްކަމަށްވާ ނިއު ދިއްލީ ގެ ފިނި ހޫނުމިން ވެސް ވަނީ 52 ޑިގްރީ އަށް ވުރެ މައްޗަށް އަރާފައެވެ.

ހީޓް ސްޓްރޯކްގައި މަރުވި ކަމަށް އެންމެ ފުރަތަމަ ރިޕޯޓްކޮށްފައިވަނީ ނިއު ދިއްލީން އުމުރުން 40 އަހަރުގެ މަސައްކަތްތެރިއެކެވެ. އެއަށްފަހު، ހަމައެދުވަހު، އިތުރު ދެމީހަކު ވަނީ ހީޓް ސްޓްރޯކް ޖެހުމާއި ގުޅިގެން މަރުވެފައެވެ.

ހީޓްސްރޯކާއި އެނޫންވެސް ހޫނުގަދަވުމުގެ ސަބަބުން ދިމާވާ މައްސަލަތަކާއި ހުރެ އިންޑިއާގައި މިހާތަނަށް 50 މީހަކު މަރުވެފައިވާއިރު، އޭގެ ތެރެއިން 29 މީހުން ރެކޯޑް ކޮށްފައިވަނީ ހީޓްސްރޯކްގެ ސަބަބުން މަރުވި މީހުންގެ ގޮތުގައެވެ.

އިންޑިއާގެ މޫސުމާއި ބެހޭ އިދާރާއިން ވަނީ ހޫނު މޫސުމާއި ގުޅިގެން އެ ގައުމަށް ކުރަމުންދާ ހޫނު ދެމިގެންދާނެ ކަމަށް ލަފާކޮށް، އިންޑިއާގެ އުތުރާއި އިރުމައްޗަށް ރެޑް އެލާޓް ވެސް ނެރެފައެވެ. އަދި ހޫނުން ސަލާމަތްވެ ތިބުމަށްޓަކައި ކޮންމެހެން ބޭރަށް ނިކުންނަން ޖެހިއްޖެ ހާލަތެއްގައި މެނުވީ ބޭރަށް ނުނިކުތުމަށް ވެސް އެގައުމުގެ ކަމާ ބެހޭ ފަރާތްތަކުން އަންނަނީ އިލްތިމާސް ކުރަމުންނެވެ.

މިދިޔަ އަހަރުގެ ހޫނު މޫސުމުގައި ވެސް އިންޑިއާއަށް ހޫނު ގަދަ ވުމުގެ ސަބަބުން، 100 އަށް ވުރެ ގިނަ މީހުން ވަނީ މަރުވެފައެވެ.