މިހާރު ކުރިއަށްދާ އިންޑިއާގެ އާއްމު އިންތިހާބު އެގައުމުގެ ބޮޑުވަޒީރު ނަރެންދްރަ މޯދީގެ ޕާޓީ ބާރަތިޔާ ޖަނަތާ ޕާޓީ (ބީޖޭޕީ) އާއި އެ ޕާޓީއާއި އެކު ކޯލިޝަން ހެދި ނޭޝަނަލް ޑިމޮކްރެޓިކް އެލަޔަންސް (އެންޑީއޭ) އިން ބޮޑު ތަފާތަކުން ކާމިޔާބު ކުރާނެ ކަމަށް އިންތިހާބު އެގްޒިޓް ޕޯލް ދައްކައިފިއެވެ.

އިންޑިއާގެ ގާނޫނު ހަދާ މަޖިލީހުގެ ލޯވާ ހައުސް ގައި ޖުމްލަ 543 މެމްބަރުން ތިބޭއިރު، މެޖޯރިޓީ ހޯދުމަށް އޭގެ ތެރެއިން 272 ގޮނޑި ކާމިޔާބު ކުރަންޖެހެއެވެ. ގިނަ އެގްޒިޓް ޕޯލްތައް ދައްކާ ގޮތުގައި މި މަޖިލީހުގެ ތިން ބައި ކުޅަ ދެބައި އެންޑީއޭ އިން ކާމިޔާބު ކުރާނެއެވެ.

އެގޮތުން، މި އިންތިހާބުގައި އެންޑީއޭއިން 353 އާއި 401 އާއި ދެމެދުގެ އަދަދަކަށް ގޮނޑި ކާމިޔާބު ކުރާނެ ކަމަށް ބޮޑެތި ފަސް އެގްޒިޓް ޕޯލަކުން ދައްކާއިރު، މި އަދަދު އަދިވެސް މައްޗަށް ދާނެ ކަމަށް ލަފާ ކުރެވެއެވެ. މި ޕާޓީން މީގެ ކުރިން 2019 ވަނަ އަހަރު ބޭއްވި އިންތިހާބުގައި 353 ގޮނޑި އާއިއެކު މަޖިލީހުގެ މެޖޯރިޓީ ހޯދާފައިވާއިރު، އެ ފަހަރު ބީޖޭޕީން ވަނީ 303 ގޮނޑި ހޯދާފައެވެ.

ހަމައެއާއިއެކު، މި ފަސް ޕޯލްގެ ތެރެއިން ތިން ޕޯލަކުން ދައްކާގޮތުގައި 2019 ވަނަ އަހަރަށް ވުރެ ގިނައިން މިފަހަރު ބީޖޭޕީ އިން ގޮނޑި ކާމިޔާބު ކުރާނެއެވެ.

މި އިންތިހާބު މޯދީގެ ކޯލިޝަނުން ކާމިޔާބު ކޮށްފިނަމަ، މޯދީ އަށް އިންޑިއާގެ ބޮޑުވަޒީރު ކަމުގެ ތިން ވަނަ ދައުރެއް ކަށަވަރު ވާނެއެވެ. އެއާއިއެކު އޭނާ ވެގެންދާނީ ޖަވާހަރުލާލް ނެހްރޫ އަށް ފަހު އިންޑިއާގެ ބޮޑު ވަޒީރުކަން ޖެހިޖެހިގެން ތިން ފަހަރަށް ކުރި ފަރާތަށެވެ.

މޯދީ އެންމެ ފުރަތަމަ އިންޑިއާގެ ބޮޑުވަޒީރު ކަމަށް އިންތިހާބުވީ 2014 ވަނަ އަހަރުއެވެ. އެއަށްފަހު 2019 އަހަރުވެސް އޭނާ ވަނީ ބޮޑު އަޣުލަބިއްޔަތަކުން އިންޑިއާގެ ބޮޑުވަޒީރުކަމަށް އިންތިހާބުވެފައެވެ.

މި އިންތިހާބުގައި އިދިކޮޅުން ވާދަކުރަނީ ރާހުލް ގާންދީ ގެ ޕާޓީ އިންޑިއަން ނޭޝަނަލް ކޮންގްރެސް (އައިއެންސީ) އިން އިސްވެ އުފެއްދި "އިންޑިއާ" ކޯލިޝަނެވެ. އެގްޒިޓް ޕޯލް ގެ ނަތީޖާތައް ދައްކާގޮތުން އިންޑިއާގެ 37 ޕާޓީ ހިމެނޭ މި ކޯލިޝަނަށް އާއްމުންގެ އެހާ ބޮޑު ތަރުހީބެއް ލިބިފައިއެެއް ނުވެއެވެ.

7 ފޭސް އަކަށް ބަހާލައިގެން 19 އޭޕްރިލް އިން ޖޫން 1 އަށް ކުރިއަށްގެންދިޔަ މި އިންތިހާބުގެ ވޯޓްތައް ގުނައި، ނަތީޖާ އާއްމު ކުރާނީ ޖޫން 4 ގައިއެވެ.