އިސްރާއީލުގެ ޕާސްޕޯޓު މަނާކުރުމަށްޓަކައި ގާނޫނު އަސާސީ އަށް ގެންނަންޖެހޭ ބަދަލުތައް ގެނައުމަށް ނިންމާފައިވާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ވިދާޅުވީ، މިފަދައިން ނިންމާފައިވަނީ މިއަދު ކުރިއަށްދިޔަ ވަޒީރުންގެ މަޖިލީހުގެ ބައްދަލުވުމުގައި ކަމަށާއި، މީގެ އިތުރުން ވެސް ފަލަސްތީނުގެ މައްސަލައިގައި ދިވެހި ރާއްޖެ އިން އަމަލު ކުރާނެ ކަނޑައަޅާފައިވާ ކަމަށެވެ.

ވަޒީރު އިޙްސާން ވިދާޅުވީ، އެކަމަށްޓަކައި ވަޒީރުންގެ މަޖިލީހުގެ ކޮމިޓީއެއް ވެސް އެކުލަވާލާފައިވާ ކަމަށާއި، އެ ކޮމިޓީގައި ހިމެނޭ ވަޒީރުންނަކީ ވަޒީރު އިޙްސާންއާއި، ހާރިޖީ ވަޒީރު މޫސާ ޒަމީރާއި، ބަންޑާރަ ނައިބު އަހްމަދު އުޝާމް އާއި އިގްތިސާދާއި ބެހޭ ވަޒީރު މުހައްމަދު ސައީދާއި، ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ގެ އިތުރުން އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ކަމަށެވެ.

މީގެ އިތުރުންވެސް، އިސްރާއީލާއި ފަލަސްތީނުގެ މައްސަލައިގައި ރާއްޖޭގެ ފަރާތުން ފަލަސްތީނުން އެދޭ ކަންކަން ދެނެގަތުމަށްޓަކައި ރައީސް ޑރ.މުޢިއްޒު އެންވޯއިއެއް ކަނޑައެޅުމަށް ނިންމަވާފައިވާކަމަށް ވެސް ވަޒީރު ހާމަކުރެއްވިއެވެ. އަދި އދ ގެ ވޯކް އެންޑް ރިލީފް އެޖެންސީ މެދުވެރިކޮށް، ފަލަސްތީނުގެ ހާލުގައި ޖެހިފައިވާ އަޚުންނާއި އުޚުތުންނަށް އެހީތެރިކަން ފޯރުކޮށްދިނުމަށްޓަކައި ފަންޑް ރައިޒް ކުރުމަށް ހަރަކާތްތަކެއް ވެސް ވަނީ ރާވާފައެވެ.

ފަލަސްތީނުގެ ހައްގުގައި ރާއްޖެއިން ކުރުމަށް ނިންމާފައިވާ މަސައްކަތްތަކަކީ:

1. އިސްރާއިލްގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށްޓަކައި ޤާނޫނުތަކަށް ގެންނަންޖެހޭ އިސްލާހްތައް ގެނައުމަށް ކެބިނެޓުން ނިންމެވުން އަދި މިކަން ކުރިއަށް ގެންދިއުމަށް ވަޒީރުންގެ މަޖިލީހުގެ ކޮމިޓީއެއް އެކުލަވާލުން.

2. ފަލަސްތީނާއި އިސްރާއީލްގެ މައްސަލައިގައި ރާއްޖޭގެ ފަރާތުން ފަލަސްޠީނުގެ ފަރާތުން އެދޭކަންކަން ދެނެގަތުމަށް ރައީސް ސްޕެޝިއަލް އެންވޯއިއެއް ކަނޑައަޅުއްވަން ނިންމެވުން.

3. ޔޫ.އެން ރިލީފް އެންޑް ވޯރކްސް އެޖެންސީ މެދުވެރިކޮށް ފަލަޞްޠީނުގެ ޙާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމަށްޓަކައި ރާއްޖޭގައި ފަންޑްރައިޒް ކުރުމަށް ހަރަކާތްތަކެއް ހިންގުމަށް ނިންމުން

4. "ފަލަސްތީނާއިއެކު ދިވެހިން" މި ނަމުގައި މުޅި ރާއްޖޭގައި ހިނގާލުމެއް ބާއްވަންނިންމުން.

5. ދިވެހިރާއްޖެއިން އިސްނަގައިގެން ފަލަޞްޠީނުގެ މައްސަލައަށް އަވަސް ޙައްލެއް ގެނައުމަށްޓަކައި އިސްލާމީ ޤައުމުތައް އެކުވެގެން މަޝްވަރާ ބައްދަލުވުންތަކެއް ބޭއްވުމަށް ނިންމުން

ދިވެހި ރާއްޖެ އަކީ އަބަދުވެސް ފަލަސްތީނުގެ ހައްގުގައި ވަކާލާތު ކުރަމުން އަންނަ ގައުމެއް ކަން ފާހަގަކޮށްލަން ޖެހެއެވެ.