ޔަހޫދީންގެ ޣައިރު ގާނޫނީ ދައުލަތް، އިސްރާއީލުން ކުރިއަށްގެންދާ ގަތުލުއާއްމު ހުއްޓާލުމާއި ގުޅޭ ގޮތުން އެމެރިކާގެ ރައީސް ޖޯ ބައިޑެން ހާމަކުރި މަގު ޗާޓު އިސްރާއީލުން ބަލައިގެންފައިވާކަމަށް އެގައުމުގެ ހައްދު ފަހަނަ އަޅާފައިވާ ބޮޑު ވަޒީރު، ބެންޖަމިން ނަތަންޔާހޫ އާއި ގާތް މީހަކު ބުނެފިއެވެ.

ހަނގުރާމަ ހުއްތާލުމާއި ގުޅޭ ގޮތުން ބައިޑަން ހުށަހެޅި މަގުޗާޓު އިސްރާއީލުން ގަބޫލުކޮށް، ހަމާސް އިން ހައްޔަރުކުރި ޔަހޫދީން ދޫކޮށްލުމަށް އެދޭ ނަމަވެސް، އެޔަށް ބައެއް ބަދަލު ގެންނާނެ ކަމަށް ވެސް އޭނާ ވަނީ ބުނެފައެވެ.

ބައިޑެން އިސްރާއީލާއި އެއްކޮޅަށް ގެންގުޅޭ ސިޔާސަތުތަކުގެ ސަބަބުން އޭނާ އަށް ފާޑުކިޔުންތައް އަމާޒުވެފައިވާ ދަނޑިވަޅެއްގައި އޭނާ ހިއްސާކުރި މި މަގުޗާޓް ވަނީ 3 ފިޔަވައްސަކަށް ބަހާލާފައެވެ.

މަގު ޗާޓުގެ 3 ފިޔަވައްސަކީ: 

ފުރަތަމަ ފިޔަވަހި - 6 ހަފްތާއަށް ހަނގުރާމަ މެދުކަނޑާލުމާއި އެކު، މީހުން ދިރިއުޅެމުންދާ ހުރިހާ ސަރަހައްދަކުން ޔަހޫދީ ފައުޖުން ފައިބައިގެންދާން ޖެހޭނެއެވެ. އަދި ހަމާސް އިން ހައްޔަރު ކުރި ޔަހޫދީންނާއި، ޔަހޫދީ ސިފައިން ހައްޔަރު ކުރި ފަލަސްތީނުގެ އާއްމުން ދޫކޮށްލުމާއި އެކު ދުވާލަކު 600 އިންސާނީ އެހީގެ ޓްރަކް ޣައްޒާ އަށް ވަނުމަށް މަގުފަހި ކުރަން ޖެހޭނެއެވެ.

ދެވަނަ ފިޔަވަހި - ހަމާސް އިން ހައްޔަރު ކުރި ޔަހޫދީ ސިފައިންނާއި، ޔަހޫދީ ފައުޖުން ރަހީނު ކުރި ހަމާސް ގެ މުޖާހިދުން ދޫކޮށްލުމާއިއެކު، ޔަހޫދީ ފައުޖު ޣައްޒާ އިން ފައިބައި، ހަނގުރާމަ ހުއްޓާލުމާއި ގުޅޭ މަޝްވަރާތައް ފަށަން ޖެހޭނެއެވެ.

ތިންވަނަ ފިޔަވަހި - ޣައްޒާގެ އާއްމުންނަށް އެހީ ފޯރުކޮށްދިނުމާއި ޣައްޒާ އަލުން އާރާސްތުކުރުމުގެ މަސައްކަތް ފަށަން ޖެހޭނެއެވެ.

މިކަމާއި ގުޅިގެން ހަމާސް އިން ބުނީ، މި މަގުޗާޓު ދިރާސާ ކުރަމުންދާ ކަމަށާއި، ދެމެހެއްޓެނިވި ގޮތެއްގައި، ދާއިމީކޮށް ހަނގުރާމަ ހުއްޓާލުމާއި ގުޅޭ މަޝްވަރާތައް ކުރުމަށް ތައްޔާރު ކަމަށެވެ. އޭގެތެރޭގައި ޔަހޫދީ ފައުޖު އެއްކޮށް ޣައްޒާއިން ފައިބައިގެން ދިޔުމާއި، ގަތުލުއާއްމާއި ގުޅިގެން ގެދޮރުދޫކޮށް ދާން ޖެހުނު މީހުން އަނބުރާ އެމީހުންގެ ގެތަކަށް އައުމަށް މަގު ފަހިކޮށްދިނުމާއި، އިސްރާއީލުން ރަހީނުކުރި މުޖާހިދުންނާއި އާއްމުން ދޫކޮށްލާނެ ކަމަށް އެއްބަސްވާނަމަ، ހަމާސް އިން ހައްޔަރުކުރި ޔަހޫދީން ދޫކޮށްލުން ހިމެނެއެވެ.