ނިރުބަވެރި އިސްރާއީލުގެ ރައްޔިތުންނަށް ރާއްޖެ ނާދެވޭ ގޮތަށް ރާއްޖޭގެ ޤާނޫނު ބަދަލުކުރަން ދިވެހި ސަރުކާރުން ނިންމި ނިންމުން ދުނިޔޭގެ ސަމާލުކަމަށް އަތުވެއްޖެއެވެ.

ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު، އަލީ އިހުސާން ވިދާޅުވީ އިސްރާއީލު ޕާސްޕޯޓް މަނާކުރުމަށް ވަރަށް އަވަހަށް ޤާނޫނަށް އިސްލާހު ހުށަހަޅުއްވާނެ ކަމަށެވެ.

މި ކަން އިޢުލާން ކުރެއްވުމާއެކު ކުޑަ ވަގުތުކޮޅެއްގެ ތެރޭގައި މި ޚަބަރު ވަނީ ދުނިޔޭގެ މީޑިއާތަކުގެ ސަމާލު ކަމަށް އައިސްފައެވެ. އެގޮތުން 'ދަ މިޑްލް އީސްޓް އައި' އާއި އިންޑިއާ ޓުޑޭ އަދި އެސޯސިއޭޓު ޕްރެސް (އޭޕީ) އިން ވެސް އެ ޚަބަރު ވަނީ ގެނެސް ދީފައެވެ.

Advertisement

މީގެ އިތުރުން އިސްރާއީލުގެ ނޫހެއް ކަމަށްވާ 'ޓައިމްސް އޮފް އިސްރާއީލްއިން' ވެސް މި ޚަބަރު ގެނެސްދީފައިވާއިރު، އިސްރާއިލުގެ ޚާރިޖީ ވަޒީރު، އެ ޤައުމުގެ މީހުން ރާއްޖެއަށް ނުދިޔުމަށް އިލްތިމާސް ކޮށްފައިވާކަން ފާހަގަ ކޮށްލެވެއެވެ.

އިސްރާއީލުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، މިހާރު ރާއްޖޭގައި އިސްރާއީލުގެ ރައްޔިތުން ތިބި ނަމަ، ވީހާވެސް އަވަހަކަށް، ފުރައިގެން ދިއުމަށް އިލްތިމާސް ކުރާކަމަށެވެ. 

މިއަދުގެ ކެބިނެޓު ބައްދަލުވުމުގައި ރާއްޖެއިން އިސްރާއިލުގެ ޕާސްޕޯޓު ބޭން ކުރުމަށް ޤާނޫނަށް ބަދަލުގެންނަން ނިންމާފައިވާއިރު މީގެ އިތުރުންވެސް، އިސްރާއީލާއި ފަލަސްތީނުގެ މައްސަލައިގައި ރާއްޖޭގެ ފަރާތުން ފަލަސްތީނުން އެދޭ ކަންކަން ދެނެގަތުމަށްޓަކައި ރައީސް ޑރ.މުޢިއްޒު އެންވޯއިއެއް ކަނޑައެޅުމަށްވެސް ވަނީ ނިންމަވާފައެވެ. އަދި އދ ގެ ވޯކް އެންޑް ރިލީފް އެޖެންސީ މެދުވެރިކޮށް، ފަލަސްތީނުގެ ޙާލުގައި ޖެހިފައިވާ އަޚުންނާއި އުޚުތުންނަށް އެހީތެރިކަން ފޯރުކޮށްދިނުމަށްޓަކައި ފަންޑް ރައިޒް ކުރުމަށް ހަރަކާތްތަކެއް ވެސް ވަނީ ރާވާފައެވެ.