މިހާރު ކުރިއަށްދާ 20 ވަނަ ރައްޔިތުންގެ މަޖިލީހުން ޖުޑީޝަލް ސަރވިސް ކޮމިޝަން (ޖޭއެސްސީ) އަށް ކަނޑައަޅާ މެމްބަރަކަށް މާފުށި ދާއިރާގެ މެންބަރު ހުސައިން ރިޒާ އާދަމް އައްޔަނުކުރުމަށް މަޖިލީހުން ފާސްކޮށްފިއެވެ.

އަދު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި، ރިޒާ ގެ ނަންފުޅު ފާސްކޮށްފައިވާއިރު، މި މަގާމަށް ކުރިމަތިލުމަށް ހުޅުވާލުމުން  ހުށަހަޅާފައިވަނީ ހަމައެކަނި ރިޒާގެ ނަމެވެ. ޖޭއެސްސީގެ މެންބަރުކަމަށް ރިޒާގެ ނަން ހުށަހެޅުއްވީ މަނަދޫ ދާއިރާގެ މެންބަރު ހުސްނީ މުބާރިކެވެ.

އެއާއިއެކު، ރިޒާ ޖޭއެސްސީއަށް އައްޔަން ކުރެއްވުމަށް ފާސްކޮށްފައިވަނީ ރައްޔިތުންގެ މަޖިލީހުގެ ޖަލްސާގައި ބައިވެރިވެވަޑައިގެންނެވި 83 މެންބަރުންގެ އަޣުލަބިއްޔަތުންނެވެ.

Advertisement

ޖޭއެސްސީގައި ރައްޔިތުންގެ މަޖިލީހުގެ ފަރާތުން މަޖިލީހުގެ ރައީސާއި މަޖިލީހުގެ މެންބަރަކު އިންނަން ޖެހޭއިރު، މި ދައުރުގައި މަޖިލީހުގެ ފަރާތުން ޖޭއެސްސީގައި ތިއްބަވާނީ މަޖިލީހުގެ ރައީސް އަބްދުއްރަޙީމް އަބްދުﷲ އާއި މެންބަރު ރިޒާއެވެ.

މީގެ އިތުރުންވެސް ދެން ޖޭއެސްސީގައި ތިއްބަވާނީ އުއްތަމަފަނޑިޔާރު ފިޔަވައި ސުޕްރީމްކޯޓުގައި ހިމެނޭ ފަނޑިޔާރުންގެ ތެރެއިން ފަނޑިޔާރަކާއި ހައި ކޯޓުގެ ފަނޑިޔާރަކާއި ދަށު ކޯޓުތަކުގެ ފަނޑިޔާރުންގެ ތެރެއިން އިންތިޚާބުކުރާ ފަނޑިޔާރަކާއި އާންމުންގެ ތެރެއިން ކުރިމަތިލާ މީހުންގެ ތެރެއިން މަޖިލީހުން ކަނޑައަޅާ މެންބަރަކާއި ސިވިލް ސާވިސް ކޮމިޝަން (ސީއެސްސީ)ގެ ރައީސާއި ބަންޑާރަ ނައިބުގެ އިތުރުން ރައީސުލްޖުމްހޫރިއްޔާ އައްޔަން ކުރައްވާ މެމްބަރަކާއި ވަކީލުންގެ ތެރެއިން އިންތިޚާބުކުރާ މެންބަރެކެވެ.