ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ކެބިނެޓުގައި ހިމެނިވަޑައިގަންނަވާ ވަޒީރުންގެ ތެރެއިން 19 ވަނަ މަޖިލީހުން ރުހުން ނުދޭން ނިންމި 3 ވަޒީރުންނަށް ރުހުން ދިނުމަށް ސަރުކާރުގެ މަސްއޫލިއްޔަތު މިންވަރު އަދާކުރާ ކޮމިޓީއަށް ފޮނުވައިފިއެވެ.

ނިމިދިޔަ މަޖިލީހުން ރުހުން ނުދިން ތިން ވަޒީރުންނަކީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދާއި ބަންޑާރަނައިބު އަހުމަދު އުޝާމާއި ހައުސިން މިނިސްޓަރު ޑރ. އަލީ ހައިދަރެވެ.

މިއަދު ބޭއްވި 20 ވަނަ ރައްޔިތުންގެ މަޖިލީހުގެ ޖަލްސާގައި އެ ތިން ވަޒީރުންނަށް ރުހުން ހޯދުމަށް ރައީސް ޑރ.މުޢިއްޒު ފޮނުއްވި ސިޓީ  އިއްވާފައިވާއިރު، މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެ މައްސަލަ ސަރުކާރުގެ މަސްއޫލިއްޔަތު މިންވަރު އަދާކުރާ ކޮމިޓީއަށް ފޮނުއްވާފަ އެވެ.

Advertisement

އެއާއިއެކު، މި މައްސަލަ އަށް ކޮމިޓީން ރިޕޯޓެއް އެކުލަވާލައި، ހުށަހެޅުމާއިއެކު، ވަޒީރުންނަށް ރުހުން ދިނުމާ މެދު ތަޅުމުން ގޮތެއް ނިންމާނެއެވެ.

ޖެނުއަރީ 29، ގައި ބޭއްވި ރައްޔިތުންގެ މަޖިލީހުގެ ޖަލްސާގައި މި ތިން ބޭފުޅުން ފިޔަވާ، މި ސަރުކާރުގެ ކެބިނެޓްގައި ހިމެނިވަޑައިގަންނަވާ ހުރިހާ ބޭފުޅުންނަށް ވަނީ ރުހުން ދީފައެވެ.

ވަޒީރުންނަށް ރުހުން ނުދިން ނަމަވެސް، ހަމައެދުވަހު ރައީސް ޑރ.މުޢިއްޒު ވަނީ މި ތިން ބޭފުޅުން އަލުން އެމަގާމް ތަކަށް އައްޔަނުކުރައްވައި، ރުހުން ހޯދުމަށް އަލުން މަޖިލީހަށް ފޮނުއްވާފައެވެ. އެހެންނަމަވެސް، 19 ވަނަ ރައްޔިތުންގެ މަޖިލީހުގެ ދައުރު ނިމުނު އިރުވެސް، މި ބޭފުޅުންނަށް ރުހުން ދިނުން އެޖެންޑާ ކޮށްފައެއް ނުވެއެވެ.