ޔަހޫދީންގެ ޣައިރު ގާނޫނީ ދައުލަތް، އިސްރާއީލަކީ މުޅި އިންސާނިއްޔަތަށް ހުރި ނުރައްކަލެއްކަމަށް ތުރުކީ ގެ ރައީސް ރަޖަބް ޠައްޔިބް އުރުދުޣާން ވިދާޅުވެއްޖެއެވެ.

ތުރުކީގެ ގާނޫނު ހަދާ މަޖިލީހުގައި ވާހަކަފުޅު ދައްކަވަމުން އުރުދުޣާން ވަނީ އިސްރާއީލުން ބައިނަލްއަގުވާމީ ގާނޫނުތަކަށް ބޯނުލަބާހާ ހިނދަކު އެއްވެސް ގައުމަށް ރައްކާތެރިކަމެއް ނެތް ކަމަށް ވިދާޅުވެ، ޣައްޒާގައި ހިންގަމުންދާ ގަތުލުއާއްމަށް ފިޔަވަޅު އެޅުމަށް އިސްލާމީ ގައުމުތަކުގެ ވެރިންނަށް ގޮވާލައްވާފައެވެ.

ހަމައެއާއިއެކު، އުރުދުޣާން ވަނީ އދ ފަދަ ބައިނަލްއަގުވާމީ ސިސްޓެމް ތަކުން ޣައްޒާގެ ގަތުލުއާއްމު ހުއްޓުވުމަށް ނުކުޅެދިފައިވާތީ އެކަމަށްވެސް ފާޑު ވިދާޅުވެފައެވެ. މިގޮތުން އެބޭފުޅާ ވަނީ އދ އިން އެމީހުންގެ އަމިއްލަ މުއައްޒަފުން ޔަހޫދީން ގެ އަތްދަށުން ރައްކާތެރި ނުކުރެވުނުއިރު، ހުއްޓުވޭނީ ކޮން ހަނގުރާމައެއްތޯ ސުވާލު އުފައްދަވާފައެވެ. އަދި ޣައްޒާއާއި ގުޅޭ ގޮތުން ނެތިގެން ދިޔައީ އިންސާނިއްޔަތު ނޫން ކަމަށާއި، ޣައްޒާގެ ފަޑުވަމުންދާ ރޫހާއި އެކު އދ ވެސް ނެތެމުންދާކަމަށް އުރުދުޣާން ވިދާޅުވިއެވެ.

އިސްރާއީލުން ޣައްޒާގައި ހިންގަމުންދާ ގަތުލުއާއްމުގައި ހުޅަނގުގެ ގައުމުތަކުގެ ބައިވެރިވުންވާ ކަމަށް ތުހުމަތުކުރައްވަމުން އުރުދުޣާން ވިދާޅުވީ، ކުށެއްނެތް އާންމުން އެމީހުންގެ ޓެންޓް ތަކާއި އެކު އަންދާލުމަކީ އެއްވެސް ގޮތަކަށް އެއްވެސް ބަޔަކަށް ގަބޫލު ކުރެވިގެންވާނެ ކަމެއް ނޫންކަމަށެވެ. 

އުރުދުޣާން ގެ ވާހަކަފުޅު ނިންމާލަމުން އެބޭފުޅާ ވަނީ ޣައްޒާގެ ގަތުލުއާއްމު ހުއްޓުވުމުގައި އިސްލާމީ ދުނިޔޭގެ ދައުރަށް އަލި އަޅުއްވާލައްވައި، މިކަމުގެ ޒިންމާ ނަގަންޖެހޭނެ ކަމަށާއި، މާތް ﷲ އަށް ޖަވާބުދާރީ ވާން ޖެހޭނެ ކަމަށް ވިދާޅުވެފައެވެ.