އިންޑިއާ އިން ރާއްޖެއަށް ކަނޑައަޅުއްވާފައިހުންނަވާ ސަފީރު، ތިލަމާލެ ބްރިޖު މަޝްރޫޢުގެ ސައިޓަށް ޒިޔާރާތްކުރައްވައިފިއެވެ.

އިމާރާތްކުރުމާއި ބިނާރާ ބެހޭ ވުޒާރާއިން މިއަދު ހާމަކުރެއްވި ގޮތުގައި، އެ ވުޒާރާގެ ވަޒީރު، ޑރ. ޢަބްދުﷲ މުއްޠަލިބާއި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރް ވަނީ ތިލަ މާލެ ބްރިޖު މަޝްރޫޢުގެ ސައިޓަށް ޒިޔާރާތް ކުރައްވާފައެވެ. 

މި ޒިޔާރާތުގައި، ތިލަ މާލެ ބްރިޖު މަޝްރޫޢުގެ މަސައްކަތް ހިނގަމުން ދާ ގޮތާއި ނިމިފައި ހުރި މަރުޙަލާތައް ބެއްލެވުމަށްޓަކައި، ވަޒީރާއި ސަފީރާއެކު، ހައި ކޮމިޝަނުގެ އިސް ބޭފުޅުންނާއި، އިމާރާތްކުރުމާއި ބިނާރާ ބެހޭ ވުޒާރާގެ އިސްވެރީން، އަދި ޓެކްނިކަލް ޓީމެއްވެސް ބައިވެރިވެލެއްވިއެވެ.

Advertisement

މި ޒިޔާރާތުގައި، އެންމެ އިސްކޮށް މި މަޝްރޫޢުގެ މަސައްކަތްތަކާ ބެހޭ ފަހުގެ މައުލޫމާތު ދެއްވުމަށް ހުންނެވީ މަޝްރޫޢުގެ ކޮންސަލްޓަންޓާއި ކޮންޓްރެކްޓަރ އެފްކޮންސްގެ ރެޕްރެޒެންޓޭޓިވްއެވެ. 

މި ޒިޔާރާތުގެ ތެރެއިން ދެނެގަނެވުނު އެކިއެކި ކަންކަމާ ގުޅޭގޮތުންނާއި، މަޝްރޫޢޫގެ މަސައްކަތްތައް ކުރިއަށް ދާ ބާރު މިނާ މެދު ހިތްހަމަޖެހިވަޑައިގަންނަވާ ކަމަށާއި، އިންޑިއާ ސަރުކާރާއި އެމްބަސީއާ ގުޅިގެން ރަނގަޅަށް މަސައްކަތް ކުރިއަށް ގެންދެވޭނެކަން، ވަޒީރު ފާހަގަ ކުރެއްވިއެވެ.

އިންޑިއާގެ ސަފީރުވެސް ވަނީ މި މަޝްރޫޢު ކުރިއަށް ދާ ގޮތާ މެދު ހިތްހަމަ ޖެހޭކަން ފާހަގަކުރައްވާފައެވެ. 

މިހާތަނަށް ތިލަމާލެ ބްރިޖު މަޝްރޫޢުގެ މަސައްކަތުގެ ތެރެއިން 38.88% މަސައްކަތް ވަނީ ނިމިފައެވެ. މަޝްރޫޢުގެ ދަށުން، ޖެހުމަށް ހަމަޖެހިފައިވާ ތަނބުތަކުގެ ޕައިލިންގެ 66% ނިންމާފައިވާއިރު، އޭގެ ތެރެއިން ޕައިލް ކެޕްގެ 46% މަސައްކަތާއި ޕިއަރ ކޮލަމްސް ގެ 48% މަސައްކަތް ވަނީ ނިމިފައެވެ. އަދި މަޝްރޫޢުގެ ޑެކަށް ބޭނުންވާ ޕްރީކާސްޓް ސެގްމަންޓްސް ގެ 31% ކާސްޓުކޮށް ނިންމާފައިވާއިރު، މިހާތަނަށް ވިލިމާލޭގައި ވިހި ސެގްމަންޓް ވަނީ ލޯންޗުވެސް ކޮށްފައެވެ.