އެސްޓީއޯ އިން އެކުންފުނީގެ ހިއްސާދާރުންނާއި ނުރަސްމީގޮތުން ބައްދަލުކޮށް ކުންފުނީގެ ކަންކަމާމެދު މަޝްވަރާކުރުމަށް ހަމަޖެހިފައިވާ ކަމަށް ކުންފުނިން ބުނެފިއެވެ.
އެސްޓީއޯއިން ބުނީ މި ބައްދަލުވުން އޮންނާނީ، 8 ޖޫން 2024 ވާ ހޮނިހިރު ދުވަހުގެ 11:00 ގައި އެސްޓީއޯ ޓްރެއިނިންގ އިންސްޓިޓިއުޓ،ް އެސްޓީއޯ ޓްރޭޑް ސެންޓަރ، 4 ވަނަ ފަންގިފިލާ ގައި ކަމަށެވެ.
މި ބައްދަލުވުމަށް ވަޑައިގަންނަވަން ބޭނުންފުޅުވާ ހިއްސާދާރުން 07 ޖޫން 2024 ވާ ހުކުރު ދުވަހުގެ 11:00 ގެ ކުރިން mv.sto.Portal މެދުވެރިކޮށް ރަޖިސްޓަރީ ކުރުމަށް އެސްޓީއޯ އިން އެދެއެވެ.
އެ ކުންފުނިން އިތުރަށް ބުނީ، މިއީ ހިއްސާދާރުންނާއެކު ބާއްވާ ނުރަސްމީ ބައްދަލުވުމަކަށް ވާތީ، މި ބައްދަލުވުމަށް ޕްރޮކްސީ ޢައްޔަންކުރުމަށް ހަމަޖެހިފައި ނުވާކަމަށާއި ބައްދަލުވުމުގައި ބައިވެރިވެވޭނީ ރަޖިސްޓަރީކުރާ ތާރީޚާއި ހަމައަށް އުމުރުން 16 އަހަރު ފުރިފައިވާ ހިއްސާދާރުންނަށް ކަމަށެވެ.
މިޖަލްސާގައި އެއްވެސް އައިޓަމެއް ފާސްކުރަން ހުށައެއް ނޭޅޭނެކަމަށް އެ ކުންފުނިން ހާމަކުރެއެވެ.
އެސްޓީއޯއިން ވަނީ މި ކުންފުނީގެ އެންމެހާ ހިއްސާދާރުން ބައްދަލުވުމަށް އައުމަށް އެދި ދައުވަތު އަރުވާފައެވެ.
Advertisement
This content is created and paid for by advertisers and does not involve Voice Journalists
