ފަރުމާކުރަން ދިން ސުވެނިއަރތަކަކީ މެންބަރުންނަށް ދޭން ނުވަތަ މެންބަރުންގެ ބޭނުމަށް ހަދާ ތަކެތި ނޫން ކަމަށް ބުނެ، ރައްޔިތުންގެ މަޖިލީހުން މީޑިއާއެއްގައި ޝާޢިއު ކޮށްފައިވާ ނޫހަކަށް ރައްދު ދީފިއެވެ. 

މިއަދު މީޑިއާއެއްގައި ޝާއިޢުކޮށްފައިވާ ރިޕޯޓަކަށް ރައްދުދީ މަޖިލިސް އިދާރާއިން ބުނެފައިވަނީ، ސުވެނިއަރ ތަކަކީ، ސުވެނިއަރ ޝޮޕަށް ޒިޔާރާތްކުރާ ޢާންމުންގެ ތެރެއިން އެތަކެތި ބައްލަވައިގަންނަވަން ބޭނުންފުޅުވާ ބޭފުޅުންނަށް ބަހައްޓާފައި ހުންނަ ތަކެތި ކަމަށެވެ.

އެކަމާ ބެހޭގޮތުން މީޑިއާއެއްގައި ޝާޢިއު ކޮށްފައިވާ ލިޔުމެއްގައި ފާޑު ކިޔާފައިވަނީ، އަންދާސީ ހިސާބު ހުށަހެޅުމަށް ރައްޔިތުންގެ މަޖިލީހުގެ އިދާރާއިން ގެޒެޓުގަައި ކޮށްފައިވާ އިއުލާނަކަށެވެ. އިއުލާނުގައި ވަނީ ރައްޔިތުންގެ މަޖިލީހުގެ އިދާރާ އިން ދޭ ޑިޒައިނާއެއްގޮތަށް ސުވެނިއަރ ތަކެތި ތައްޔާރުކޮށް ސަޕްލައިކޮށްދޭނެ ފަރާތެއް ހޯދަން ބޭނުންވާ ވާހަކައެވެ.

Advertisement

ދައުލަތުގެ ޚަރަދުގައި މިފަދަ ކަންކަން ކުރާއިރު، މަސްވެރިންނަށް ފައިސާ ނުދޭ ކަމަށާއި، ފައިސާ ނެތުމުގެ ސަބަބުން ރަށް ރަށުގައި ކުރިން ފަށާފައިވާ ތަރައްޤީގެ މަޝްރޫޢުތައް މަޑު ޖެހިފައިވާކަމަށް އެ ލިޔުމުގައި ވެއެވެ. އަދި އެ ކަންކަމަކަށް ފައިސާ ޚަރަދު ކުރުން މާ ބުއްދިވެރި އަދި ބޭނުންތެރި ކަމަށް ޤަބޫލު ކުރެވޭކަމަށެވެ.

މި ރިޕޯޓާ ގުޅިގެން މަޖިލިސް އިދާރާއިން ބުނެފައިވަނީ ރައްޔިތުންގެ މަޖިލީހުގެ ސުވެނިއާ ޝޮޕްގެ މަސައްކަތް ފެށީ މީގެ 3 އަހަރު ކުރިން 2021 ގައި ކަމަށެވެ. އޭރު ސުވެނިއަރ ޝޮޕަށް ބޭނުންވާ ތަކެތި ފަރުމާކޮށްދޭނެ ފަރާތެއް ހޯދަން ގެޒެޓުގައި އިއުލާންވެސްކުރި ކަމަށާއި ނަމަވެސް ފަހުން ސުވެނިއާތައް ޑިޒައިންކުރީ މަޖިލީހުގެ ގްރެފިކް ޑިޒައިނަރު ކަމަށްވެސް މަޖިލީސް އިދާރާއިން ވަނީ ބުނެފައެވެ.

އެގޮތުން ސުވެނިއަރތައް ޑިޒައިން ކުރަން އިޢުލާން ކުރި ތާރީޚުތައްވެސް މަޖިލީސް އިދާރާއިން ވަނީ ހާމަ ކުރައްވާފައެވެ.

މަޖިލީހުން ހާމަ ކުރެއްވި ގޮތުގައި އެ ޢިދާރާގެ ސުވެނިއަރ ޝޮޕަށް ސުވެނިއަރ ފަރުމާ ކުރާނެ ބަޔަކު ހޯދަން ފުރަތަމަ އިޢުލާން ކުރީ 21 ޖޫން 2021 ގައެވެ. އަދި އޭގެ ފަހުން 2021 ވަނަ އަހަރުގެ އޯގަސްޓް މަހުގެ 17 ވަނަ ދުވަހުވެސް ސުވެނިއަރތައް ފަރުމާކޮށް ތައްޔާރުކޮށްދޭނެ ބަޔަކު ހޯދަން އިޢިލާން ކޮށްފައިވެއެވެ. އަދި 16 އޭޕްރިލް 2024 ގައި ފަރުމާ އާ އެއްގޮތަށް ސުވެނިއަރ ތައްޔާރު ކޮށްދޭނެ ބަޔަކު ހޯދަންވެސް އިޢުލާން ކުރިއެވެ.

މަޖިލިސް އިދާރާއިން އިތުރަށް ވިދާޅުވީ، ސުވެނިއާތަކުގެ ތެރޭގައި ހިމެނެނީ ދުނިޔޭގެ އެހެން ގާނޫނު ހަދާ މަޖިލީސްތަކުގެ ސުވެނިއާ ޝޮޕްތަކުގައިވެސް ހުންނަ ފަދަ ގަލަމާއި ފޮތާއި ތަށި އަދި ސަމުސަލާއި އޫ ސެޓް ފަދަ ތަކެތި ކަމަށެވެ.

އެހެންކަމުން އެ މީޑިއާގައި ލިޔުއްވާފައިވަނީ ޙަޤީގަތާ ޚިލާފު މައުލޫމާތުކަމަށް މަޖިލީސް އިދާރާއިން ވަނީ ބުނެފައެވެ.