19 ވަނަ މަޖިލީހުން ރުހުން ނުދެއްވި ތިން ވަޒީރުންނަށް، ވިހި ވަނަ މަޖިލީހުގެ ކޮމިޓީއިން ރުހުން ދެއްވައިފިއެވެ. 

މިރޭ މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީން ބޭއްވި ކޮމެޓީގެ ބައްދަލުވުމުގައި ތިން ވަޒީރުންނަށް ރުހުން ދޭން ފާސްކޮށްފައިވަނީ ކޮމެޓީ އަށް ހާޒިރުވެ ތިއްބެވި ނުވަ މެންބަރުންގެ ތެރެއިން ހަތް މެންބަރުންގެ ވޯޓުންނެވެ. 

19 ވަނަ މަޖިލީހުން ރުހުން ދީފައި ނުވަނީ، ބަންޑާރަ ނާއިބު އަހްމަދު އުޝާމާއި، އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދާއި، ހައުސިން މިނިސްޓަރ ޑރ. އަލީ ހައިދަރަށެވެ. 

ވަޒީރުންނަށް ރުހުން ދިނުމަށް 19 ވަނަ މަޖިލީހުގައި ނެގި ވޯޓުގައި، ބަންޑާރަ ނާއިބުކަމަށް އުޝާމް އައްޔަނު ކުރަން ރުހުންދީ، ވޯޓު ދެއްވާފައިވަނީ 24 މެންބަރުންނެވެ. އަދި ވޯޓޫގައި ބައިވެރިވެލެއްވި 44 މެންބަރުންވަނީ ރުހުން ނުދޭން ވޯޓުލައިފައެވެ.

އިސްލާމިކް މިނިސްޓަރު ކަމަށް ޑރ. ޝަހީމް އައްޔަނުކުރަން، ރުހުން ދޭން 30 މެންބަރުން ވޯޓު ދެއްވި އިރު، ރުހުން ނުދޭން 31 މެންބަރުން ވޯޓު ދިނެވެ.

ހައިދަރަށް ހައުސިން މިނިސްޓަރުކަން ދޭން ރުހުން އޮތްތޯ ބެލުމަށް ނެގި ވޯޓުގައި 46 މެންބަރުން ވަނީ އޭނާއަށް ރުހުން ނުދޭން ވޯޓު ދީފައެވެ. ރުހުންދޭން ވޯޓު ދެއްވީ 26 މެންބަރުންނެވެ.

މަޖިލީހުން ރުހުން ނުދެއްވި ނަމަވެސް ރައީސް ޑރ. މުޙައްމަދު މުޢިއްޒު ވަނީ އެ މަޤާމުތަކަށް އަލުން އެ ބޭފުޅުން އައްޔަން ކުރައްވާފައެވެ.