ރާއްޖޭގެ ކަންކޮޅުތަކުގައި އުފެދިފައިވާ ގޭންގުތަކުގެ މައްސަލަތައް ޙައްލުކުރުމަށް ފުލހުންގެ ވަކި ޑިޕާޓްމެންޓެއް އުފެއްދުމަށް ނިންމަވައިފިއެވެ.
މިކަން އިޢުލާން ކުރައްވާފައި ވަނީ، ކުރިއަށްއޮތް ފަސް އަހަރު ދުވަހުގެ ފުލުހުންގެ ސްޓްރެޓެޖިކް ޕްލޭން އިފްތިތާހުކުރުމަށް އިސްކަންދަރު ކޮށީގައި މިއަދު ބޭއްވި ހާއްސަ ރަސްމިއްޔާތުގައެވެ.
މި ރަސްމިއްޔާތުގައި ވާހަކަ ދައްކަވަމުން، ޕޮލިސް ކޮމިޝަނަރު އަލީ ޝުޖާއު ވިދާޅުވީ އިސްލާމްދީނާއި ރާއްޖޭގެ ގާނޫނާއި ގަވާއިދުތައް ތަންފީޒުކުރުމުގައި ކެރިގެން ކުރިމަތިލާ ބައެއްކަމުގައި ފުލުހުން ވާނެ ކަމަށާއި، ކުރިއަށް އޮތް ފަސް އަހަރު ދުވަހަށް އެކުލަވާލާފައިވާ ސްޓްރެޓެޖިކް ޕްލޭނުގައި އެންމެ މުހިންމު ކަމެއްގެ ގޮތުގައި ކަނޑައަޅާފައި އޮތީ އެކިކަހަލަ ކުށްތަކާ ކުރިމަތިލުން ކަމަށެވެ.
"އެންމެ މުހިންމު ކަމެއްގެ ގޮތުގައި ކަނޑައަޅާފައި އޮތީ ކޮންބެޓިންގް ކްރައިމްސް. ހާއްސަގޮތެއްގައި ގައުމުގައި އެންމެ ކަންބޮޑުވާ ޑްރަގު މައްސަލައިގެ އިތުރުން ކުށްކުރާ ގްރޫޕުތަކުގެ ބިވުރެވިކަމުން ދިވެހި ގައުމު ސަލާމަތް ކުރުމަށްޓަކައި އަޅުގަނޑުމެން އާ މަސައްކަތްތަކެއް ކުރުމަށް މި ޕްލޭނުގައި ހިމެނިފައި އެބަވޭ"
ޝުޖާއު ވިދާޅުވިއެވެ.
ރާއްޖޭގައި ސުލްޙަ މަސަލަސްކަން ޤާއިމުކުރުމަށް ފުލުހުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން މިއަދު ސްޓެރެޓެޖިކް ޕްލޭން އިފްތިތާޙު ކުރިއިރު، ޕްލޭނާ ގުޅޭގޮތުން މައުލޫމާތު ދެއްވަމުން، ފުލުހުން ވިދާޅުވީ، މަސްތުވާތަކެއްޗާއި ގޭންގު ވައިލެންސާ ދެކޮޅަށް މަސައްކަތްކުރުމުގެ ގައުމީ ސްޓްރެޓެޖީއަކާއެކު ޑްރަގް އަދި ވައިލެންޓް ކްރައިމްއާ ދެކޮޅަށް މަސައްކަތްކުރާނެ ބަހާއެއް ގާއިމުކުރެވިގެންދިޔުމުގެ އިތުރުން ސްކޭމްގެ ޝިކާރައަކަށްވުން މަދުކުރުމަށްޓަކައި އެންޓި ސްކޭމް ސެންޓަރެއް ގާއިމުކޮށް، ނެއިބަރހުޑް ޕޮލިސިންގ އިތުރަށް ތަރައްގީކުރުމަށްޓަކައި ލޯކަލް ޕޮލިސިންގ ސްޓްރެޓެޖީއެއް އެކުލަވާލައި ރާއްޖޭގެ ހުރިހާ ކަންކޮޅެއްގައި ތަންފީޒުކުރުމުގެ މަސައްކަތްކުރެވިގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
