ގޮތް ނޭނގޭ ދުނިޔެއެއްގައި ދިރިއުޅެން ދަރިވަރުންނަށް ދަސްކޮށްދިނުމަށް ވަޒީރު އާދަމް ޝަރީފު ޢުމަރު އިލްތިމާސްކުރައްވައިފިއެވެ. 

ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު މިފަދައިން އިލްތިމާސް ކުރެއްވީ ބ.އަތޮޅު ތައުލީމީ މަރުކަޒުގައި ރޭ ބޭއްވި އެ ތަޢުލީމީ މަރުކަޒުގެ އަހަރީ އިނާމު ދިނުމުގެ ޖަލްސާގައި ވާހަކަ ދައްކަވަމުންނެވެ.

އެ ޖަލްސާގައި ވާހަކަ ދައްކަވަމުން އެމަނިކުފާނު އިތުރަށް ވިދާޅުވީ، ދިވެހީންގެ ރާއްޖެއަށް ދިވެހީން މި ކުރާ ދަތުރު ކާމިޔާބު ދަތުރަކަށް ހެދޭނީ، މަސައްކަތުގެ މާޙައުލުގައި، މަސައްކަތުގެ އަޚުލާޤު ރަނގަޅު، ޙަވާލުކުރާ މަސައްކަތް ޒިންމާދާރުކަމާއެކީ، ފޫހިކަމެއް ވަރުބަލިކަމެއް ނެތި މަސައްކަތުގައި އަބަދުމެ ދެމި ތިބޭ ބަޔަކަށް ހެދިގެން ކަމަށެވެ. 

އަދި ބިދޭސީން މި ރާއްޖެއަށް ގެންނަ މިންވަރު އިތުރުވެފައި އޮތުމަކީ އިޤްތިޞާދީ ގެއްލުމެއްގެ އިތުރުން ދިވެހިންގެ ފުދުންތެރިކަމާ، އަމިއްލަ ވަންތަކަން ދެމެހެއްޓުމަށް ވެސް އޮތް ގޮންޖެހުމެއް ކަމަށް ވަޒީރު ވިދާޅުވިއެވެ.