އިންޑިއާގެ ގޯ އެއާއިން މީރާއަށް 3.6 މިލިއަން ޑޮލަރު ދައްކަން ސިވިލް ކޯޓުން ހުކުމްކޮށްފިއެވެ. މިއީ ދިވެހި ރުފިޔާއިން އަގު ކުރާނަމަ 55.5 މިލިއަން ރުފިޔާއެވެ.
އިންޑިއާގެ ގޯ އެއާއިން މޯލްޑިވްސް އިންލޭންޑް ރެވެނިއު އޮތޯރޮޓީ (މީރާ) އަށް 3.6 މިލިއަން ޑޮލަރު ދައްކަން ޙުކުމް ކޮށްފައިވަނީ 2022 ވަނަ އަހަރުގެ އޭޕްރީލު މަހުން ފެށިގެން 2023 ވަނަ އަހަރުގެ މާރިޗު މަހުގެ ނިިޔަލަށް އިންޑިއާގެ ގޯ އެއާއިން ދައްކަން ޖެހޭ ފީއަކާއި ޓެކުހެއް މީރާއަށް ދައްކާފައިނުވާތީއެވެ.
އެގޮތުން ގޯ އެއާއިން މީރާއަށް ދައްކަންޖެހޭ ސަރވިސް ޗާޖާއި ޑިޕާޗަރ ޓެކުހާއި ޑިވެލޮޕްމެންޓް ފީ މީގެ ތެރޭގައި ހިމެނެއެވެ.
މި މައްސަލައާ ގުޅިގެން ސިވިލް ކޯޓުން ގޯ އެއާއަށް ތިން ފަހަރެއްގެ މަތިން ދައުވާ ރައްދުކުރަން މަސައްކަތްކޮށްފައިވެއެވެ. އެގޮތުން އެކުންފުނީގެ އެޑްރެސްގެ ގޮތުގައި ކަނޑައަޅާފައިވާ މ.ނަރުގިސްއަށް ދައުވާ ފޯމް ފޮނުވުމުން އެ ކުންފުނިން ކޯޓަށް ހާޒިރުވެފައިނުވާ ކަމަށް ސިވިލް ކޯޓުން ހާމަ ކުރިއެވެ.
އެހެންކަމުން މިއަދު ގޯ އެއާއަށް ޙުކުމް ކޮށްފައިވަނީ އެ ކުންފުނީގެ ޣައިރު ހާޒިރުގައި، މާލޭގައި ހުންނަ އެސްޓީއޯ އައިފާނު ބިލްޑިންގެ ތިން ވަނަ ފްލޯއަށް އެޑްރެސްކޮށެވެ.
Advertisement
This content is created and paid for by advertisers and does not involve Voice Journalists
