އިސްރާއީލުގެ ބޮޑުވަޒީރު، ބެންޖަމިން ނަތަންޔާހޫގެ ހަނގުރާމަ ކެބިނެޓުން ދެވަޒީރުން، ހަނގުރާމައިގައި ބަލިވަމުންދާކަމަށް ބުނެ ކެބިނެޓުން އިސްތިއުފާ ދީފިއެވެ. 

ހަނގުރާމައިގައި ނަތަންޔާހޫ ގެންގުޅެމުންދާ ސިޔާސަތުތަކާ ނުރުހުންވެ އިސްތިއުފާ ދީފައިވަނީ، ވަޒީރު، ބެނީ ގާންޓްޒް އާއި ގާދީ އައިސެންކޮޓް އެވެ.

އިސްރާއީލުން، ފަލަޞްޠީނާ ދެކޮޅަށް ހިންގަމުންދާ ހަނގުރާމައާ ގުޅިގެން، ނަތަންޔާހޫ އެކުލަވާލި ހަނގުރާމަ ކެބިނެޓުގެ އިސް މެންބަރެއް ކަމަށް ވާ ބެނީ ގާންޓްޒް އިސްތިއުފާ ދީފައިވަނީ، ޤައުމުގެ ރައްކާތެރިކަމަށް ވުރެ ސިޔާސީ ނިޒާމަށް ނަތަންޔާހޫ އިސްކަންދޭކަމަށް ބުނެ ނުރުހުންފާޅުކުރުމާ އެކުއެވެ. އޭނާ މިއަދު ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ އިސްތިއުފާ ދޭން ނިންމީ، ހަނގުރާމަ މެދުކަނޑާލުމަށް، ނަތަންޔާހޫ ދެކޮޅުހަދަމުންދާތީއާއި، ހަނގުރާމައަށް ރަނގަޅު ރޭވުމެއް އެކުލަވާލަން ނަތަންޔާހޫ ނުކުޅެދުމުގެ ސަބަބުން ކަމަށެވެ. 

Advertisement

މީގެ އިތުރުން ބެނީ ގާންޓްޒް ވަނީ، ހަނގުރާމައިގެ ސަބަބުން ނުބޭއްވިފައި އޮތް އެ ޤައުމުގެ ރިޔާސީ އިންތިޚާބު އަވަސް ތާރީޚެއްގައި ބޭއްވުމަށްވެސް ގޮވާލާފައެވެ. 

ބެނީ ގާންޓްޒްއަކީ، ސިޔާސީގޮތުން، ނަތަންޔާހޫއާ ވާދަކުރާ އިދިކޮޅު އިސް ކެނޑިޑޭޓެވެ. ހަނގުރާމަ ފެށުމަށްފަހު، ހަނގުރާމަ ކެބިނެޓު އެކުލަވާލާ، މިދެމީހުން އެއްގަލަކަށް އެރި ނަމަވެސް، ނަތަންޔާހޫގެ ސިޔާސަތުތަކަށް ފާޑުކިޔާ ބެނީ ވަނީ ކުރިންވެސް އިސްތިއުފާ ދޭނެ ކަމަށް އިޝާރާތް ކޮށްފައެވެ. 

މީގެ އިތުރުން ބެނީ ގާންޓްސް އިސްރާއީލުގެ ޑިފެންސް މިނިސްޓަރު ޔޯއަވް ގަލަންޓް އަށް "ރަނގަޅު ނިންމުން" ނިންމަން  ގޮވާލާފައިވާކަން ފާހަގަކޮށްލެވެއެވެ.

ބެނީ ގާންޓްޒްގެ އިތުރުން، އިސްތިއުފާދިން އައިސެންކޮޓަކީ، އިސްރާއިލީ ޑިފެންސް ފޯސެސް (އައިޑީއެފް) ގެ ކުރީގެ ޗީފެވެ. އޭނާ ނަތަންޔާހޫއަށް ފޮނުވި، އިސްތިއުފާގެ ސިޓީގައި ބުނެފައިވަނީ ހަނގުރާމައިގައި، އެމީހުން ބޭނުންވާ ނަތީޖާތައް ނެރުމަށް އެތައް މަސައްކަތްތަކެއް ކުރި ނަމަވެސް، ކެބިނެޓުން ނިންމަމުން ދާ ނިންމުންތައް ދަނީ، އެ ނެތީޖާތައް ނެރުމަށް ހުރަސްއަޅަމުން ކަމަށެވެ.

އިސްރާއީލުގެ މި އިސްވެރިން އިސްތިއުފާ ދީފައިވަނީ، މިދިޔަ ހަފްތާ ބަންދުގައި، އިސްރާއީލުން ނުޞައިރާތު ރެފިއުޖީ ކޭމްޕުގައި ބޮޑު ޤަޠުލުޢާންމެއް ހިންގުމަށް ފަހު، 4 އަސީރުން އެނބުރި އިސްރާއީލަށް ގެންގޮސްފައިވާ ދަނޑިވަޅެއްގައެވެ. މި 4 މީހުން ސަލާމަތް ކުރުމުގެ ނަމުގައި އިސްރާއީލުން ވަނީ، މަދުވެގެން 200 މީހުން ޝަހީދުކޮށްލާފައެވެ. އަދި މި ލޭއޮހޮރުވުމުގައި އިސްރާއީލުގެ 3 އަސީރުންވެސް މަރުވެފައިވާކަން ފާހަގަކޮށްލެވެއެވެ. 

އިސްރާއީލުން ފަލަޞްޠީނުގައި ހިންގަމުންދާ ލާއިންސާނީ ޖަރީމާ ތަކުގައި، މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް ހަމައެކަނި ޣައްޒާއިން ވަނީ 37,124 މީހުން ޝަހީދުވެފައެވެ. މީގެ ތެރޭގައި 15,000 އަށް ވުރެ ގިނަ ކުޑަކުދިން ހިމެނެއެވެ. އިސްރާއީލުން ހުއްޓުމެއްނެތި ދެމުންދާ ޙަމަލާ ތަކުގައި، ޣައްޒާއިން 84,712 މީހުން ޒަޚަމް ވެފައިވާއިރު، ގެއްލިފައިވާ މީހުންގެ ޢަދަދު ވަނީ 10،000 އިން މައްޗަށް ގޮސްފައެވެ. 

އޮކްޓޯބަރު މަހުގެ 7 ވަނަ ދުވަހަށް ފަހު، ހިފާފައިވާ ހުޅަނގު އައްސޭރިން ވަނީ، 134 ކުޑަކުދިން ހިމެނޭހެން 534 މީހުން ޝަހީދުކޮށްލާފައެވެ. އަދި އިސްރާއީލުން ދިން ޙަމަލާތަކުގައި އެކި ވަރުގެ އަނިޔާތައް ލިބި ހުޅަނގު އައްސޭރިން ޒަޚަމްވި މީހުންގެ ޢަދަދު ވަނީ 5,000 އިން މައްޗަށް ގޮސްފައެވެ.