ރައީސް ޑރ.މުޢިއްޒު އިންޑިއާގެ ރައީސާ ބައްދަލުކުރައްވައިފިއެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، އިންޑިއާގެ ރައީސާ ދުރޫޕަދީ މުރުމޫ އާ ބައްދަލުކުރެއްވީ މިއަދު، ނިއުދިއްލީގައި ހުންނަ އިންޑިއާގެ ރިޔާސީ ގަނޑުވަރު ރާޝްތުރަޕަތީ ބަވަންގައެވެ.

މި ބައްދަލުވުމުގައި، ދެ ޤައުމުގެ ތަރައްޤީއާއި ކުރިއެރުމަށް ގުޅިގެން މަސައްކަތްކުރުމުގެ މުހިންމުކަން ފާހަގަކުރައްވާފައިވެއެވެ. އެގޮތުން އިންޑިއާ ސަރުކާރުގެ "ނޭބަރހުޑް ފަސްޓް ޕޮލިސީ" ގެ ދަށުން ރާއްޖޭގެ ތަރައްޤީއަށް މަގުފަހިކުރުމަށް އެހީތެރިވެދިނުމުގެ ޝައުގުވެރިކަން އިންޑިއާގެ ރައީސް ވަނީ ފާޅުކުރައްވާފައެވެ. 

Advertisement

މި ބައްދަލުވުމުގައި، ރައީސް ޑރ.މުޢިއްޒު ވަނީ އިންޑިއާ ސަރުކާރުން ރާއްޖެއަށް ފޯރުކޮށްދެމުން ދާ އެހީތެރިކަމަށް ޝުކުރު އަދާކުރައްވާ، ދެ ޤައުމުގެ ދެމެދު އޮންނަ ތާރީޚީ ގާތް ގުޅުން އެގޮތުގައި ދެމެހެއްޓުމަށް އެދިވަޑައިގަންނަވާކަން ހާމަކުރައްވާފައެވެ. އަދި ދެ ޤައުމުން ގުޅުން ބަދަހިކޮށްފައިވާ ދާއިރާތަކުން އިތުރަށް ގުޅުން ވަރުގަދަ ކުރަން ބޭނުންފުޅުވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން މި ބައްދަލުވުމުގައި، އިންޑިއާގެ ރައީސް ވަނީ، ވިހިވަނަ ރައްޔިތުންގެ މަޖިލީހުގެ އިންތިޚާބުގައި ސަރުކާރުން ސުޕަރ މެޖޯރިޓީ ހޯދާފައިވާތީ އެކަން ފާހަގަކުރައްވައި, ރައީސް ޑރ.މުޙައްމަދު މުޢިއްޒުއަށް މަރުހަބާ ވިދާޅުވެފައެވެ.