ފަލަސްޠީނަށް އެހީވުމަށް އދގެ ރިލީފް ފަންޑަށް ދިވެހި ސަރުކާރުން ކޮންމެ އަހަރަކު ދެމުން އަންނަ ފައިސާގެ އެހީ, މިއަހަރު 50 ހާސް ޑޮލަރަށް އިތުރުކުރުމަށް ނިންމާފައިވާކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.
ރާއްޖެއިން ފަލަސްތީނަށް އެހީވުމަށް ކުރިއަށްގެންދާ، ‘ފަލަސްތީނާއެކު ދިވެހީން’ ޓެލެތޯން ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރުވަނީ ފަލަސްތީނަށް އެހީވުމަށް އދ އިން އުފައްދާފައިވާ ޔުނައިނެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް "އަންރުވާ" އަކީ ޔޫއެންއިން 1948 ވަނަ އަހަރު ފާސްކުރި ޤަރާރަކުން ވުޖޫދަށް އައި ގޮތްޕެއް ކަން ފާހަގަކުރައްވާފައެވެ.
މި ފަންޑަށް ރަމްޒީ އެހީއެއްގެ ގޮތުން ރާއްޖެއިން އަންނަނީ އަހަރަކު 5000 ޑޮލަރު. އެކަމަކު މިދިޔަ އަހަރު 7 އޮކްޓޯބަރުން ފެށިގެން އިސްރާއިލުން ދެމުންދާ ޙަމަލާތަކާ ގުޅިގެން، ފަކަސްތީނަށް ވެފައިވާ ގެއްލުން ތަކުގެ ސަބަބުން، މިއަހަރު އަޅުގަނޑުމެން ރައީސުލްޖުމްހޫރިއްޔާ ވަނީ މިއަހަރު މި ފަންޑަށް ދައުލަތުގެ ފަރާތުން 50000 ޑޮލަރު ދޭން ނިންމާފައި. އެއީ މިހާރު ދޭ މިންވަރަށްވުރެ 10 ގުނަ އިތުރު އަދަދު."
ޚާރިޖީ ވަޒީރު މޫސާ ޒަމީރު
ވަޒީރު ވިދާޅުވީ މި ފައިސާ ހަވާލުކުރާނީ ފިނޭންސް މިނިސްޓްރީއާއި މޯލްޑިވްސް މަނިޓަރީ އޮތޯރިޓީ އެމްއެމްއޭ މެދެވެރިކޮށް، ޚާރިޖީ ވުޒާރާގެ ބެއްލެވުމުގެ ދަށުންކަމަށެވެ. އަދި މަސައްކަތް ކުރިއަށްގެންދިއުމަށް "ކްރޯ މޯލްޑިވްސް އެލްއެލްބީ" ކިޔާ މިނިވަން އޮޑިޓަރެއް ހަމަޖައްސާފައިވާކަމަށްވެސް ވަޒީރު ވިދާޅުވިއެވެ.
ވަޒީރުގެ ވާހަކައިގައި ވަނީ ފަލަސްޠީނާމެދު ރާއްޖެއިން ގެންގުޅޭ ސިޔާސަތަށް ވެސް އަލި އަޅުވާ ލައްވާފައެވެ.
1967 ވަނަ އަހަރުން ފެށިގެން އިސްރާއިލުން ހިފާފައިވާ ފަލަސްތީނުގެ ހުރިހާ ބިންތަކުން، ޝަރުތެއް ނެތި އިސްރާއިލުން ފޭބުމާ، ފަލަސްތީނުގެ ރައްޔިތުންގެ އަމިއްލަ އިޚްތިޔާރު އޮތުމުގެ ފުރުޞަތު ފަހިކުރުމާ އަދި އދގެ ސަލަމާތީ މަޖިލީހުގެ ޤަރާރު 242 އަދި 338ގެ މައްޗަށް ބިނާކޮށް އިރުމަތީ ޤުދުސްއަކީ ފަލަސްޠީނުގެ ވެރިރަށްކަމަށް ކަނޑައެޅުމާއި އަމިއްލަ މިނިވަން އިސްތިޤްލާލެއް އޮތް ދަޢުލަތެއް ޤާއިމުކޮށް، އިޒްރާއިލުން ފަލަސްތީނުގެ ރައްޔިތުންގެ ޙައްގުތަކަށް އަރައިގަނެ، ހުއްޓުމެއްނެތި ހިންގަމުންދާތީ އެޢަމަލުތައް ރާއްޖެއިން ކުއްވެރިކުރުން އެއީ އަޅުގަނޑުމެންގެ ސިޔާސަތަކީ.
މިއާއެކު ވަޒީރު ވަނީ ފަލަސްތީނުގެ ހައްގުގައި ރާއްޖެއިން ކުރަމުންދާ މަސައްކަތްތަކަށްވެސް އަލިއަޅުވާލައްވާފައެވެ.
އެގޮތުން ވަޒީރު ވިދާޅުވީ ފަލަސްތީނުގެ ދަޢުލަތަކީ އދގެ ފުރިހަމަ މެންބަރެއްގެ ގޮތުގައި ބަލައިގަތުމަށް އަރަބި ގްރޫޕްގެ ފަރާތުން އެކުވެރި އަރަބި އިމާރާތް ޔޫއޭއީން ހުށައެޅި ގަރާރު ރާއްޖެއިން ކޯ ސްޕޮންސަރކޮށްފައިވާކަމަށެވެ. މި ގަރާރު 10މޭގައި އދ ގެ އާއްމު މަޖިލީހުން ފާސްކޮށްފައިވާއިރު، އެކަމުގެ ޑްރާފްޓް ޤަރާރު އެންމެ ފުރަތަމަ ކޯ-ސްޕިންސަރކުރި ގައުމުތަކުގެ ތެރޭގައިވެސް ރާއްޖެ ހިމެނޭކަން ފާހަގަކުރެއްވިއެވެ.
މީގެ އިތުރުން މިމަހުގެ 10ވަނަ ދުވަހު އދގެ ސަލާމަތީ މަޖިލީހުން ފާސްކުރި ޤަރާރު، ފަލަސްތީނުގައި ހިންގަންމުންދާ ހަނގުރާމަ ހުއްޓާލަން ފާސްކުރި ޤަރާރަށް ރާއްޖެއިން ތަޢީދުކޮށް މަރުޚަބާ ކިޔާކަންވެސް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
