"ކާށިދޫ ކައުންސިލް ފުޓްބޯޅަ ޗެލެންޖު 2024" މިމަހުގެ 20 ގައި ފެށުމަށްޓަކައި އެންމެ ފަހުގެ ތައްޔާރީތައްވަމުން އަންނަކަމަށް މުބާރާތް ރާވައި ހިންގުމުގައި އިސްކޮށް ހަރަކާތްތެރިވާ އެރަށުގެ ކުލަބު ޖަމުއިއްޔާއެއް ކަމަށްވާ އެމްޖީ ސްޕޯޓްސް ކުލަބުން ބުނެފިއެވެ.

އެމްޖީ ސްޕޯޓްސް ކުލަބުގެ އޮފިޝަލަކު ވޮއިސް ސްޕޯޓްސްއަށް މައުލޫމާތު ދިންގޮތުގައި މިއީ ކައުންސިލްގެ މުބާރާތް އެކުލަބުން އިންތިޒާމްކޮށްގެން ބާއްވާ ތިންވަނަޱއަހަރު ކަމަށެވެ. މީގެ ކުރިން މިރަށުގައި ބާއްވަމުން އައީ ފުޓްސަލް ނުވަތަ 9v9 އެވެ. ނަމަވެސް މިއީ 90 ގެ އަހަރުތަކުގެ ފަހުން މިރަށުގައި 11v11 ކުޅޭ ފުރަތަމަ ފަހަރެވެ. 

ކާށިދޫ ކައުންސިލްގެ ފަރާތުން މިފަދަ މުބާރާތެއް ބޭއްވުމުގެ މަގުސަދަކީ ރަށުގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން، ކާށިދޫގައި ބޮޑު ފުޓްބޯޅައިގެ ފޯރި ދިރުވައި އާލާކުރުމެވެ. އަދި މީގެ އިތުރުން ރަށުގެ ޒުވާނުންނަށް ވާދަވެރި މުބާރާތްތަކެއްގައި ބައިވެރިވުމުގެ ފުރުސަތު ހޯދައިދިނުމެވެ.

20 ޖޫން 2024 އިން 30 ޖޫން 2024 އަށް ކުރިއަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގެ ޗެންޕިއަން ޓީމަށް 30،000 އަދި ރަނަރަޕް ޓީމަށް 20،000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ. 

މިމުބާރާތުގައި މިއަހަރު ހަ ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމެޖެހިފައިވަނީ ބައިވެރިވި ހަޓީމު ދެ ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖައެއް ހޯދާ ދެޓީމު ސެމީ ފައިނަލަށް ހޮވޭއިރު، މުބާރާތުގެ ސެމީ ފައިނަލް ދެމެޗު ކުޅުމަށް ހަމަޖެހިފައިވަނީ ޖޫން 27 އަދި 28 ވަނަ ދުވަހު އެވެ. އަދި ފައިނަލް މެޗު ކުޅުމަށް ހަމަޖެހިފައިވަނީ ޖޫން 30 ވަނަ ދުވަހު އެވެ.

މިއަހަރުގެ މުބާރާތުގެ ޓްރަވަލް ޕާޓްނާއަކަށް މައިދޫ ސްޕީޑް އަދި ބެވަރޭޖް ޕާޓްނަރ އަކަށް އާރުވީ ސްޓޯރު ހަމަޖައްސާފައިވާއިރު، ޕްރިންޓިން ޕާޓްނަރަކީ ޔުނިކް އައިޑިއާ އެވެ. އަދި މީގެ އިތުރުން މި އަހަރުގެ މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.