މާލޭގައި ފެންބޮޑުވާ މައްސަލަ ޙައްލު ކުރުމަށް ޢިއްޒުއްދީންމަގު މަރާމާތު ކުރަން ފަށައިފިއެވެ.

މިއަދު މާލެ ސިޓީ ކައުންސިލްގެ މޭޔަރު އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ، މަރާމާތުކުރުމުގެ ގޮތުން، މ. އިއްޒުއްދީންމަގު (ފަލާހުޕުރީސްކޫލް) ކުރިމަތި ރޫޅަމުންދާ ކަމަށެވެ. 

ޢިއްޒުއްދީން މަގަކީ ފެން ހިނދުން ލަސްމަގެއްކަން ފާހަގަ ކުރައްވާ މޭޔަރު އާޒިމް ވިދާޅުވީ، މަގު ހަދާ ނިމުމުން މައްސަލައަށް ޙައްލެއް ލިބިގެންދާނެ ކަމަށެވެ. އަދި ފެންބޮޑުވުމުގެ ސަބަބުން، ހިނގާ މީހުންނަށާއި، ސްކޫލް ކުދިންނަށް ވަމުންދާ ދަތިތަކަށް ޙައްލެއް ލިބިގެންދާނެ ކަންވެސް މޭޔަރު ވަނީ ފާހަގަ ކުރައްވާފައެވެ.

މީގެ އިތުރުން، މޭޔަރު އާޒިމް ވިދާޅުވީ، އެ މަގު ފަދައިން، ފެންހެދޭ އެހެން މަގުތައްވެސް މަރާމާތުކޮށް މައްސަލަ ޙައްލުކުރުމުގެ މަސައްކަތް ކުރިޔަށް އޮތް ދުވަސްތަކުގައި  ކުރިޔަށް ގެންދާނެ ކަމަށެވެ.

މާލޭގައި ފެންބޮޑުވާ މައްސަލަ ޙައްލުކުރުމަށް ސަރުކާރާއި، މާލެ ސިޓީ ކައުންސިލުން އިސްނަންގަވައިގެން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން، ފެންބޮޑުވުމުގެ މައްސަލައަށް ވަގުތީ ޙައްލެއް ގެނައުމަށް، މިދިޔަ މެއި މަހުގެ ނުވަ ވަނަ ދުވަހު، މަޝްރޫއެއް ފަށާފައިވާކަން ފާހަގަކޮށްލެވެއެވެ.