ޣައްޒާގެ މުސްލިމުންނަށް އަމާޒުކޮށް ޔަހޫދީން ހިންގާ ގަތުލުއާއްމަށް ބޭނުންވާ ހަތިޔާރު އެމެރިކާއިން ހިފަހައްޓާކަމަށް އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ ބުނާ ވީޑިއޯ އަކާއި ގުޅިގެން އެމެރިކާއިން ވަރަށް ބޮޑަށް ނުރުހުން ފާޅުކޮށް، އެކަން ކުށްވެރި ކޮށްފިއެވެ.

ޔަހޫދީ ފައުޖުން ޣައްޒާގެ މުސްލިމުންނާއި ދެކޮޅަށް ހިނގާ އުދުވާނުގައި އެމެރިކާ އަކީ އަބަދުވެސް އިސްރާއީލާއި އެއްކޮޅަށް އެންމެ ވަރުގަދަ އަށް ވަކާލާތުކުރާ ގައުމަށް ވާއިރު، ނަތަންޔާހޫ އެކްސްގައި ޕޯސްޓް ކުރި މި ވިޑިއޯ އާއި ގުޅިގެން އެމެރިކާއިން ވަނީ އެގައުމުން އިސްރާއީލުގެ މަތީ ވަފުދަކާއި އެކުގައި އޮތް ވަރަށް މުހިންމު ބައްދަލުވުމެއް ވެސް ކެންސަލް ކޮށްލާފައެވެ.

ނަތަންޔާހޫގެ މި އަމަލާއި ގުޅިގެން އެމެރިކާއިން ދެގައުމުގެ ބައްދަލުވުން ކެންސަލް ކޮށްލީ މި ބައްދަލުވުމަށް ދިޔުމަށް ޔަހޫދީން ދަތުރު ފަށާފައި ވަނިކޮށެވެ.

އަނިޔާވެރިކަން ހައްދުފަހަނައަޅާފައިވާ ނަތަންޔާހޫ ވަނީ އެމެރިކާއިން ހަތިޔާރު ފޯރުކޮށްދިނުން ހިފަހައްޓާފައިވާ ކަމަށް ތުހުމަތުކޮށް، ހަތިޔާރު އަވަހަށް ފޯރު ކޮށްދެން ޖެހޭ ކަމަށާއި، ޣައްޒާގެ ނިކަމެތި މުސްލިމުން "ނިންމާލާނެ" ކަމަށް ބުނެފައެވެ.

މިކަމާއި ގުޅިގެން އެމެރިކާގެ އޮފިޝަލަކު ބުނީ ނަތަންޔާހޫ ކިބައިގައި ޝުކުރުވެރިކަމެއް ނެތުމުގެ ސަބަބުން ބައިޑެންގެ ޓީމް ތިބީ ވަރަށް ބޮޑަށް ހިތް ހަމަނުޖެހި ރުޅި އައިސްފައި ކަމަށެވެ.

ޔަހޫދީ ފައުޖުން ޣައްޒާގެ ރަފާހް އަށް އަރައިގަތުމާއި ގުޅިގެން އެމެރިކާއިން އޭރު ވަކި މުއްދަތަކަށް ޔަހޫދީ ފައުޖަށް ހަތިޔާރު ފޯރުކޮށްދިނުން މެދު ކަނޑާލި ނަމަވެސް، އޭގެ ފަހުން އެމެރިކާއިން އަންނަނީ އެންމެ ބާވަތެއް ފިޔަވާ އެހެން ހުރިހާ ވައްތަރެއްގެ ހަތިޔާރު ޔަހޫދީންނަށް ފޯރުކޮށްދެމުންނެވެ.

ބައިނަލްއަގުވާމީ ޕޯޑިއަމް ތަކުގައި އެމެރިކާ އިން އިސްރާއީލު ދިފާއު ކުރަމުން އައި ނަމަވެސް، ފަހަކަށް އައިސް ދެ ގައުމުގެ ދެމެދުގައި ހަމަނުޖެހުންތަކެއް އުފެދިފައިވާކަން ފާހަގަކޮށްލަން ޖެހެއެވެ.

އެމެރިކާއިން ޣައްޒާއަށް އިންސާނީ އެހީ ފޯރުކޮށްދިނުމަށްޓަކައި ވަގުތީ ފާލަމެއް ބިނާ ކުރި ނަމަވެސް، ޣައްޒާގެ މިސްކިތްތަކާއި، ސްކޫލްތަކާއި، ހޮސްޕިޓަލް ތަކާއި އެހެނިހެން އިމާރާތްތައް ބިމާ ހަމަކޮށް، ކުށެއް ނެތް އެތައް ބަޔަކު ރަހުމެއްނެތި ޔަހޫދީ ފައުޖުން ޝަހީދުކޮށްލަނީ އެމެރިކާއިން ދޭ ހަތިޔާރުންނެވެ.

ޔަހޫދީ ފައުޖުގެ މި ހަމަލާތަކާއި ފިއްތުންތަކުގެ ސަބަބުން ޣައްޒާގެ އެތައް ބަޔަކު ބޯހިޔާވަހިކަމުން މަހުރޫމްވެފައިވާއިރު، ޣައްޒާގެ މައުޞޫމް އެތަކެއް ކުޑަ ކުދިންނެއް ވަނީ ޔަތީމްވެފައެވެ. ހަމައެއާއިއެކު، ބޯނެ ސާފު ފެނާއި ސިއްހަތަށް ފައިދާހުރި ކާނާއިން ޣައްޒާގެ އާއްމުން މަހުރޫމްވެފައިވާއިރު، ރަނގަޅު ސިއްހީ ފަރުވާ ނުލިބުމުގެ ސަބަބުން ޣައްޒާގައި އެކި ވައްތަރުގެ ނުރައްކާތެރި ބަލިތައް ދަނީ ފެތުރެމުންނެވެ.