ރާއްޖެއިން މި އަހަރު ހައްޖަށް ދިޔަ ހައްޖުވެރިން ބަލައި އެއާޕޯޓަށް ދާ މީހުން ފުލުހުންގެ އިރުޝާދުތަކާއި އެއްގޮތަށް އަމަލުކުރުމަށް ދިވެހި ފުލުހުންގެ ޚިދުމަތުން އެދެފިއެވެ.

ދިވެހި ފުލުހުންގެ ޚިދުމަތުން އެކްސްގައި ކުރި ޕޯސްޓެއްގައި ބުނީ، ހައްޖުވެރިން ރާއްޖެ އައުމަށް ހަމަޖެހިފައިވާ ދުވަސްތަކުގައި ހައްޖުވެރިން ބަލައި އެއާޕޯޓަށް ވަޑައިގަންނަވާ ގާތްތިމާގެ މީހުންނާއި އެއާޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާތްތަކުން ފުލުހުންގެ އިރުޝާދުތަކާއި އެއްގޮތަށް އަމަލުކުރުމަށް އެދޭ ކަމަށެވެ.

ފުލުހުން ވަނީ ހައްޖުވެރިން އެނބުރި ރާއްޖެ އައުމަށް ހަމަޖެހިފައިވާ ދުވަސްތައް ކަމަށްވާ މި މަހުގެ 24 އަދި 28 ވަނަ ދުވަހާއި އަންނަ މަހުގެ 1 ވަނަ ދުވަހާއި 4 ވަނަ ދުވަހު އެއާޕޯޓުގެ ޓްރެފިކް ތޮއްޖެހުން ބޮޑުވާނެ ކަމަށް ބެލެވޭ ކަމަށާއި، ޓެކްސީ ކިއުއަށް ބާރު ބޮޑުވާނެ ކަމަށް ބުނެފައެވެ.

Advertisement

ރާއްޖެއިން މި އަހަރު ހައްޖަށް ދިޔަ ހައްޖުވެރިންގެ ފުރަތަމަ ގުރޫޕު މާދަމާ ރާއްޖެ އައުމަށް ހަމަޖެހިފައިވާއިރު، ރާއްޖެއިން މިފަހަރު ހައްޖުގެ އަޅުކަމަށް  1،150 މީހުން ވަނީ ގޮސްފައެވެ.

ރާއްޖޭގެ ހައްޖުވެރިންގެ ތެރެއިން މިހާތަނަށް ނިޔާވީ 1 ހައްޖުވެރިއެކެވެ. މިވަގުތު ހޮސްޕިޓަލުގައި 1 ޙައްޖުވެރިއަކު އޮތްއިރު އާންމުގޮތެއްގައި ޙައްޖުވެރިންގެ ހާލުރަނގަޅު ކަމަށް މިނިސްޓްރީން ބުނެއެވެ.