ފުލުހެއްގެ ގައިގައި ކާރަކުން ޖެއްސި މީހާގެ ބަންދަށް 10 ދުވަސް ޖަހައިފިއެވެ.

ފުލުހެއްގެ ގައިގައި ކާރަކުން ޖައްސާފައިވަނީ، މިދިޔަ ހޮނިހިރު ދުވަހުގެ ހަވީރު ހުޅުމާލެ ފޭސް 1 ގައި މާރާމާރީއެއް ހިންގައިގެން އުޅޭ ކަމަށް ރިޕޯޓުކުރުމުން، އެ ސަރަހައްދަށް ފުލުހުން ދިއުމުންނެވެ.

މާރާމާރީ ހުއްޓުވުމަށް އެ ސަރަހައްދަށް ފުލުހުން ދިޔުމުން ދެ މީހަކު ކާރަކަށް އަރައި ފިލައިގެން ދާން އުޅުނެވެ. ފުލުހުން މައުލޫމާތު ދިން ގޮތުގައި، ފުލުހުން އެ ކާރު ކުރިމައްޗަށް އަރައި މަޑުކުރަން ބުނުމުން ކާރު މަޑުކުރުމަށް ފަހު، ފުލުސް އޮފިސަރު، ކާރުގެ އަރިމައްޗަށް ޖެހުނު ވަގުތު، ފުލުސްމީހާގެ ފައި މައްޗަށް އަރައިގެން ކާރު ދާން އުޅުނެވެ.

ނަމަވެސް، ކާރު ފަހަތަށް ޖެއްސުމަށް ފަހު އޮފިސަރު ކާރު ހުއްޓުވޭތޯ މަސައްކަތް ކުރި އެވެ. އަދި ބީޓް ސައިކަލުގައި، އިތުރު ދެ ފުލުހުން ކާރު ކުރިމައްޗަށް އެރިނަމަވެސް، ސައިކަލު ނައްޓުވާފައި، ކާރު، ބާރު ސްޕީޑުގައި ދިޔަ އެވެ.

އެ މައްސަލައާ ގުޅިގެން، އެ ދުވަހު އެކަކު ހައްޔަރުކޮށް، އޭނާގެ ބަންދަށް ކޯޓުން ވަނީ 15 ދުވަސް ޖަހާފައެވެ.

މި މައްސަލައިގައި އިއްޔެ ހަވީރު ހައްޔަރުކުރީ ފުލުސް މީހާގެ ގައިގާ ޖެއްސި ކާރު ދުއްވަން އިން މީހާ އެވެ.

އޭނާގެ މައްޗަށް ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް 10 ދުވަސް ދީފައެވެ.