އުތުރު ތިލަފަޅުގައި މަރުކަޒީ ޖަލެއް ގާއިމު ކުރުމަށް ހަމަޖެހިފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ހާމަކުރައްވައިފިއެވެ.

ރައްޔިތުންގެ މަޖިލީހުގެ ޤައުމީ ސަލާމަތާބެހޭ ކޮމިޓީގައި ވާހަކަފުޅު ދައްކަވަމުން ވަޒީރު އިހުސާން ވިދާޅުވީ،  ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ޖަލުތަކުގެ ހާލަތު ރަނގަޅުކުރުމަށް ކުރަމުންގެންދާ މަސައްކަތުގެ ތެރެއިން މަރުކަޒީ ޖަލެއް ގާއިމުކުރުމަށް ނިންމާފައިވާކަމަށެވެ. އަދި މިޖަލު ހުންނާނީ އުތުރުތިލަފަޅުގައި ކަމަށް ވެސް ވަޒީރު ވިދާޅުވިއެވެ.

ވަޒީރު އިހުސާން ވިދާޅުވީ، އުތުރު ތިލަފަޅުގައި ޖަލު ހަދަން ނިންމީ ބްރިޖު ހެދުމުން އެތަނަކީ އެއްގަމު މަގުން ދަތުރުފަތުރުކުރަން ފަސޭހަ ތަނަކަށްވާނެތީ ކަމަށެވެ.

Advertisement

ދުވާލެއްގެ މައްޗަށް މިހާރު ގައިދީއެއްގެ ބޮލަށް އެވްރެޖްކޮށް 27 ހާސް ރުފިޔާ ހޭދަކުރަންޖެހޭ ކަމަށާއި އެއީ ދުނިޔޭގެ ޖަލުތަކުގައި ކުރާ ހޭދަތަކަށް ބަލާއިރު ބޮޑު އަދަދެއްކަން ފާހަގަކުރައްވާ ވަޒީރު އިހުސާން ވިދާޅުވީ، މިހާ ބޮޑު ހަރަދެއް ހިނގަނީ ރާއްޖޭގެ އެކި ތަންތަނުގައި ޖަލުތައް ބިނާކޮށްފައި ހުރުުމުންކަމަށެވެ.

އެހެންނަމަވެސް އުތުރު ތިލަފަޅުގައި އަޅާ މަރުކަޒީ ޖަލާއި އެކު ދައުލަތުން ޖަލުތަކަށް ކުރާ ޚަރަދު ނިސްބަތުން ދަށްވެގެންދާނެކަމަށާއި، މި ޖަލު އެޅުމަށްޓަކައި އުތުރު ތިލަފަޅުން 30 ހެކްޓަރުގެ ޖާގަ ކަނޑައެޅުމަށް ކެބިނެޓުން ނިންމާފައިވާ ކަމަށް ވަޒީރު ވިދާޅުވިއެވެ. އަދި  އެ 30 ހެކްޓަރުގެ ޖާގަ ހިއްކުމަށް ފަހު، އެތަނުގެ ލޭންޑް ލޭއައުޓް ލިބުނުހާ އަވަހަކަށް ގްރައުންޑް ޕްލޭން ކުރަން ފަށާނެ ކަމަށާއި، މިހާރު ވެސް ތަނުގެ ރިކުއާމެންޓް ހެދުމުގެ މަަސައްކަތާއި ޖަލުގައި ހުންނާނެ ފެސިލިޓީތައް ކަނޑައަޅައި ނިންމާފައިވާކަން ވަޒީރު އިހުސާން ފާހަގަކުރެއްވިއެވެ.

މީގެ އިތުރުންވެސް ވަޒީރު ވިދާޅުވީ، ޖަލަކީ "ފުލް" ރިހެބިލިޓޭޝަން ފެސިލިޓީއަކަށް ވެގެންދާނެކަމަށާއި, ޖަލުން މީހާ މިނިވަންވެގެން އަންނައިރު މުޖުތަމަޢު ބަލައިގަންނަ މީހަކަށް ވެގެންދާނެކަމަށް ގަބޫލުފުޅު ކުރައްވާ ކަަމަށެވެ.

ގައިދީންނަށް ކުރިއަށް ގެންދާ ރިހެބިލިޓޭޝަން މަސައްކަތްތައް ކުރެވިގެންދާނީ މުސާރަ ލިބޭ ގޮތަށް ކަމަށާއި، ސަރުކާރުގެ އަމާޒަކީ ކުރިޔަށް އޮތް ތިން އަހަރުގެ ތެރޭގައި ޖަލުގެ މަސައްކަތް ނިންމާ އެތަން ބޭނުންކުރަން ފެށުން ކަމަށް ވެސް ވަޒީރު އިހުސާން ވިދާޅުވިއެވެ.