ހުޅުމާލެއިން ދޫކޮށްފައިވާ ގޯތިތަކުގައި އިމާރާތް ކުރަން ފެށުމުގެ ކުރިން އެޗްޑީސީގެ ހުއްދަ ހޯދަން އެދިއްޖެއެވެ. 

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ނެރުނު ބަޔާނެއްގައި ބުނެފައިވަނީ، މިހާރަކަށް އައިސް، ހުޅުމާލެއިން ވިއްކާފައިވާ، ނުވަތަ ކުއްޔަށް ދީފައިވާ، ނުވަތަ އިޖްތިމާޢީ، ބޯހިޔާވަހިކަމުގެ ތެރެއިން ދޫކޮށްފައިވާ ބައެއް ގޯތިތަކުގައި، އިމާރާތް ކުރާ އިރު އެ ކޯޕަރޭޝަނުން ހަދާފައިވާ ޤަވާއިދު ތަކާއި، އުޞޫލުތަކަށް ބެލުމެއް ނެތި، އަދި ހޯދަން ޖެހޭ ހުއްދަތައް ނުހޯދާ އިމާރާތް ކުރަމުން ދާ ކަން ފާހަގަ ކުރެވިފައިވާކަމެވެ.  

އަދި މި އުސޫލުތަކާ ޚިލާފަށް ގޯތިތެރޭގައި މަސައްކަތެއް ކުރަމުން ދާނަމަ ނުވަތަ އުޞޫލާ ޚިލާފަށް އިމާރާތް ކުރުމުގެ މަސައްކަތެއް ކުރަމުން ދާނަމަ އަދި އިމާރާތެއް ކޮށްފައިވާ ނަަމަ އެ ގޯއްޗެއްގެ ވެރިފަރާތާއި މެދު ކަނޑައެޅިފައިވާ އުސޫލުން ފިޔަވަޅު އަޅާނެ ކަމަށްވެސް އެޗްޑީސީގެ ބަޔާނުގައި ވެއެވެ. 

Advertisement

މީގެ އިތުރުން އެޗްޑީސީއިން ވަނީ ހުޅުމާލެއިން ދޫކޮށްފައިވާ ގޯއްޗެއްގައި އިމާރާތެއް ހަދަން ފެށުމުގެ ކުރިން އިމާރާތް ކުރާނެ ގޮތުގެ ކުރެހުމެއް އެޗްޑީސީއަށް ހުށަހަޅާ ފާސްކުރުމަށް ފަހު، އިމާރާތް ކުރުމާ ގުޅޭ އެހެނިހެން ހުއްދަތައް އެ ކޯޕަރޭޝަނުން ނެގުމަށް އިލްތިމާސް ކޮށްފައެވެ. 

ހުޅުމާލެއިން ދޫކޮށްފައިވާ ގޯތިތަކުގައި އިމާރާތް ކުރުމުގެ އުސޫލުތައް އެޗްޑީސީގެ ވެބްސައިޓުގެ،  ޑައުންލޯޑްސް އިން ބަލައިލެވޭނެއެވެ. އަދި މިކާއި، ގުޅިގެން މައުލޫމާތު ސާފު ކުރައްވަން ބޭނުންފުޅުވާނަމަ، އެޗްޑީސީގެ ހޮޓްލައިން 1516 އަށް ގުޅުއްވާ މައުލޫމާތު ސާފުކުރެވޭނެއެވެ.