ކަރެކްޝަންސްގެ 18 މުވައްޒަފެއްގެ އެކައުންޓްތަކަށް 73 މިލިޔަން ރުފިޔާ، ޖަމާކޮށްފައިވާ ކަމަށާއި، ފުލުހުން މިރޭ އެމީހުން ހައްޔަރުކުރަން ފަށާފައިވާ ކަމަށް، އެސިސްޓެންޓް ކޮމިޝަނާ އޮފް ޕޮލިސް އަބްދުالله ޝަރީފު ވިދާޅުވެއްޖެއެވެ. 

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި، ވަޒީރު އަލީ އިޙުސާން ވިދާޅުވީ ޔުނިފޯމް އެޅި އިދާރާތަކުގެ ތެރެއިން ކަރެކްޝަންސްގެ ބޮޑެތި މައްސަލަތަކެއް ބަލަމުން ދާކަމަށެވެ.

ވަޒީރު ވިދާޅުވީ, ޖަލުން ފޯނާއި މަސްތުވާތަކެތި ފެންނަ މައްސަލައިގައި 3 މަހެއްހާ ދުވަސް ކުރިން ހިންގަން ފެށި ތަހުގީގެއްގައި ކަރެކްޝަންސްގެ އޮފިސަރުން ބައިވެރިވެފައި ވާ ކަމަށެވެ. އަދި އެ ތަހުގީގަށް ފާހަގަވި ކަންކަން އިއްޔެ ލިބިވަޑައިގަތުމާއެކު، ހާއްސަ އޮޕަރޭޝަނެއް ފަށާފައިވާކަމަށްވެސް ވަޒީރު ވިދާޅުވިއެވެ.

ކަރެކްޝަންސް ބައެއް މުވައްޒަފުންގެ އެކައުންޓްތަކަށް ޖުމުލަ 73،600،000 ރ. ޖަމާވެފައިވާކަން ހާމަ ކުރައްވާ އެސިސްޓެންޓް ކޮމިޝަނާ އޮފް ޕޮލިސް އަބްދުالله ޝަރީފު ވިދާޅުވީ, އެ ފައިސާއަކީ، 2023 ގެ ޖެނުއަރީ މަހުން ފެށިގެން މިހާތަނަށް ޖަމާވެފައި ހުރި ފައިސާކަން އެނގިފައިވާ ކަމަށެވެ.

އަބްދުالله ޝަރީފު ހާމަ ކުރެއްވިގޮތުގައި، މި މައްސަލައާ ގުޅިގެން މާފުށީ ޖަލުގައި މިހާރު ކުރިއަށް ގެންދާ އޮޕެރޭޝަނުގެ ދަށުން ބައެއް މުވައްޒަފުން ވަނީ ހައްޔަރު ކޮށްފައެވެ.