ޖަލުތަކުގައި ތިބޭ ގައިދީންނަށް ފޯނާއި ޑުރަގާއި އެ ނޫން ވެސް ތަކެތި ވައްދައިދޭ މައްސަލާގައި، އެކަމަށް ތުހުމަތުވާ ނެޓްވޯކްގައި ހިމެނޭ ކަރެކްޝަނަލް ސާވިސްގެ 13 އޮފިސަރުން ހައްޔަރުކޮށްފައިވާ ކަމަށް ފުލުހުން މިއަދު ބުނެފިއެވެ.
ކަރެކްޝަންސްގެ 18 މުވައްޒަފެއްގެ އެކައުންޓްތަކަށް 73 މިލިޔަން ރުފިޔާ، ޖަމާކޮށްފައިވާ ކަމަށާ، އެ މީހުން، ގައިދީންނަށް ފޯނާއި ޑްރަގް ވައްދައިދޭ ކަމަށް ތުހުމަތު ކުރެވޭ ކަމަށް ރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނެފައިވެއެވެ. އަދި އޭގެ ތެރެއިން ހައްޔަރުކޮށްފައިވަނީ އަށް މީހުން ކަމަށް ވެސް ބުނެފައި ވެއެވެ.
ނަމަވެސް މިއަދު ފުލުހުން ބުނީ، އެ އޮޕަރޭޝަންގެ ތެރެއިން ހައްޔަރުކުރި އޮފިސަރުންގެ އަދަދު މިހާރު 13 އަށް އަރާފައިވާ ކަމަށެވެ.
އެއީ، ކ. މާފުށިން ހައްޔަރުކުރި ނުވަ އޮފިސަރުންނާއި ކ. ކާށިދޫން ހައްޔަރުކުރި ދެ މީހުންނާއި ހއ. އުތީމުން އެކަކު އަދި މާލެއިން އެކަކެވެ.
ފުލުހުން ރޭ މައުލޫމާތު ދީފައިވާ ގޮތުގައި، މި މައްސަލާގައި ތުހުނަތު ކުރެވޭ 18 މީހުންގެ ތެރެއިން ހަ މީހަކު މިހާރު ވަނީ ވަޒީފާއިން ވަކިކުރެވިފައެވެ.
އަދި އެ މީހުންނަކީ ވިޔަފާރިއެއް ކުރާ ބައެއް ނޫން ނަމަވެސް، އެކައުންޓުތަކުގައި މިލިއަނުން ފައިސާ ހުރި ކަމަށާ، ބައެއް މުވައްޒަފުންގެ އެކައުންޓަށް 24 މިލިއަން ރުފިޔާ ޖަމާވެފައިވާކަން ފާހަގަކޮށް ފުލުހުން ބުނީ، މި ފައިސާ އެކައުންޓުތަކަށް ޖަމާވަމުން އައީ ޖަލުގައި ތިބި ގައިދީންގެ އެކައުންޓުތަކުންނާއި މާލޭގައި ކުށްކުރާ މީހުންގެ އެކައުންޓުތަކުން ކަމަށެވެ.
Advertisement
This content is created and paid for by advertisers and does not involve Voice Journalists
