ޖަމީލުގެ މަރާ ގުޅޭގޮތުން ބަލަންޖެހޭ ކަންކަން ބަލަމުން ދާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވެސް (އެޗްއާރްސީއެމް) އިން ބުނެފިއެވެ.
އެޗްއާރްސީއެމް އިން މިއަދު ނެރުނު ބަޔާނުގައި ބުނެފައިވަނީ، މިނިވަންކަން ގެއްލޭ ގޮތަށް ދަޢުލަތުގެ ބެލުމުގެ ދަށުގައި ހުރި ފަރާތެއް ނިޔައު ވެއްޖެ ޙާލަތެއްގައި އެކަން ހިނގާދިޔަ ގޮތް ބަލައި، ނިޔައުވި ފަރާތުގެ ހަށިގަނޑު ބެލުމަށް ކޮމިޝަނުގެ ރެޕިޑް ރެސްޕޮންސް ޓީމު (އާރު.އާރު.ޓީ) ވަގުތުން ހަރަކާތްތެރިވާން ފަށާނެ ކަމަށެވެ.
އެހެންކަމުން، ޝަރީޢަތް ނިމެންދެން މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުން މާފުށީ ޖަލުގައި ބަންދުގައި ހުރި މުޙައްމަދު ޖަމީލް، 2024 ޖޫން 28 ވަނަ ދުވަހު ނިޔާވުމާއެކު އެ ކޮމިޝަނުގެ އާރު.އާރު.ޓީއިން ވަގުތުން ހަރަކާތްތެރިވާން ފަށާފައިވާ ކަމަށް އެޗްއާރްސީއެމް އިން ބުންޏެވެ.
އެގޮތުން، ޖަމީލުގެ ހަށިގަނޑު ބަލާ، ފޮޓޯ ނަގާ، މޯލްޑިވްސް ކަރެކްޝަނަލް ސަރވިސްގެ އޮފިސަރުންގެ ފަރާތުންނާއި، އާއިލާގެ ފަރާތުން މަޢުލޫމާތު ސާފުކޮށް، މުޙައްމަދު ޖަމީލްގެ މެޑިކަލް ފައިލްވެސް ބަލާފައިވާކަން އެޗްއާރްސީއެމް އިން ވަނީ ހާމަކޮށްފައެވެ.
މީގެ އިތުރުން، މާފުށީ ޖަލަށް ޒިޔާރަތްކޮށް، މި ހާދިސާގެ ސީ.ސީ.ޓީ.ވީ ފުޓޭޖު ބަލާފައިވާ ކަމަށާއި، ޖަމީލު ހުރި ގޮޅި ބަލާ، ޔުނިޓުގައި ތިބި ބަންދުމީހުންގެ ފަރާތުންނާއި، ޖަމީލު ކުރިން ހުރި ގޮޅީގައި ތިބި ބަންދުމީހުންގެ ފަރާތުން މަޢުލޫމާތު ސާފުކޮށްފައިވާނެ ކަމަށްވެސް އެޗްއާރްސީއެމް ވަނީ ބުނެފައެވެ.
އެޗްއާރްސީއެމް އިން އިތުރަށް ބުނީ،،މީގެ އިތުރުންވެސް މި ހާދިސާއާ ގުޅިގެން ބަލަންޖެހޭ އިތުރުކަންކަން ކޮމިޝަނުން ބަލަމުންދާކަމަށެވެ.
Advertisement
This content is created and paid for by advertisers and does not involve Voice Journalists
