ކުށް ސާބިތުވެ ޖަލަށް ޙުކުމްކުރެވޭ ކުށްވެރިންނަށް އިސްތިއުނާފު މަރުހަލާގައި ކަފާލާތުގެ ދަށުން މިނިވަންވުމުގެ ފުރުސަތު ދިނުމަށް ޖިނާއީ އިޖުރާއަތުގެ ގާނޫނަށް އިސްލާހެއް ސަރުކާރުގެ ފަރާތުން ހުށަހަޅައިފިއެވެ.

މި އިސްލާހު ރައްޔިތުންގެ މަޖިލީހުގެ އިއްޔެގެ ޖަލްސާއަށް ހުށަހެޅުއްވީ މަނަދޫ ދާއިރާގެ ޕީއެންސީގެ މެންބަރު ހުސްނީ މުބާރަކެވެ. މިއީ މި އިސްލާހު ހުށަހެޅުނު ދެވަނަ ފަހަރެވެ.

ކުރިން މި އިސްލާހު 19 ވަނަ މަޖިލީހަށް ހުށަހަޅުއްވާފައިވަނީ އިނގުރައިދޫ ދާއިރާގެ އޭރުގެ ޕީއެންސީ މެންބަރު ހަސަން އަހުމަދެވެ.

Advertisement

މިހާރު ޢަމަލުކުރަމުންދާ ޖިނާއީ އިޖުރާއަތުގެ ގާނޫނުގައި ކުށެއް ސާބިތުވާ މީހަކަށް އިސްތިއުނާފު މަރުހަލާގައި ކަފާލާތުގެ ހައްގު ލިބިދޭ ގޮތަކަށް ނެތެވެ. ކަފާލާތުގެ އުސޫލުތައް ބަޔާންކުރާ ބިލެއް މަޖިލީހަށް ހުށަހެޅުމަކީ ރައީސް މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ކަމެކެވެ.

މި އިސްލާހު ފާސްވެއްޖެނަމަ، ކުށް ސާބިތުވެ ޖަލަށް ހުކުމްކުރެވޭ ކުށްވެރިންނަށް އިސްތިއުނާފު މަރުހަލާގައި ކަފާލާތުގެ ދަށުން މިނިވަންވުމުގެ ފުރުސަތު ލިބިގެންދާނެއެވެ.