ޓައިވާނުގެ އަސްކަރީ މަރުކަޒެއްގައި ޗައިނާގެ ހުއާވޭ ކުންފުނިން އުފެއްދި ރައުޓަރުތަކެއް ހަރުކޮށްފައި ހުރިކަން ހާމަވެއްޖެއެވެ. ހުއާވޭ ކުންފުނިން، އެކުންފުނީގެ އުފެއްދުންތައް ބޭނުންކޮށްގެން ޗައިނާގެ ސަރުކާރަށް ޖާސޫސުކޮށްދޭކަމަށް ހުޅަނގުގެ ގައުމުތަކާއި ޓައިވާނުން ތުހުމަތުކުރެއެވެ. އެހެންނަމަވެސް ހުއާވޭ ކުންފުނިން ގެންދަނީ ކެނޑިނޭޅި އެކަން ދޮގުކުރަމުންނެވެ.

ޓައިވާނުގެ އަސްކަރިއްޔާގެ ހޮންގްޗައޮލިންގް ބޭސްގައި ހުއާވޭ ކުންފުނީގެ 2 ރައުޓަރާއި، ޗައިނާގެ އެޑްވާންޓެކް ކުންފުނިން އުފައްދާފައިވާ ޑޭޓާ ރީޑަރއެއް ފެނިފައިވާކަމަށް ޓައިވާނުގެ މިނިސްޓްރީ އޮފް ނޭޝަނަލް ޑިފެންސްގެ އާމަމެންޓް ބިއުރޯއިން ޓައިވާނުގެ މީޑިއާތަކަށް ވަނީ މައުލޫމާތު ދީފައެވެ. މިތަކެތި ފެނިފައިވަނީ ޓައިވާނުގެ އަސްކަރިއްޔާއަށް ބޭނުންވާ ބައެއް ސާމާނު ގަތުމާ ގުޅޭ މައްސަލައެއްގެ ތަހުގީގުގެ ތެރެއިންނެވެ.

އެމެރިކާއިން ދަތިކުރުމުގެ ފިޔަވަޅު އަޅާފައިވާ ޗައިނާގެ ވިޔަފާރިތަކާއެކު މަސައްކަތްކުރުމާއި ޓައިވާނުގެ ގާނޫނުތަކުން މަނާކޮށްފައިވާ ކަންކަން ކުރުމުގެ ތުހުމަތުގައި ޓައިވާނުގެ ބައެއް ކުންފުނިތަކަށް މީގެ ކުރިންވެސް ފިޔަވަޅު އަޅާފައިވެއެވެ. އެގޮތުން ނިމިދިޔަ އަހަރުގެ އޮކްޓޯބަރު މަހު، ހުއާވޭ ކުންފުނީގެ ސެމިކޮންޑަކްޓަރ ފެކްޓްރީތައް އެޅުމުގައި ހަރަކާތްތެރިވާ ކުންފުނިތަކަށް ޚިދުމަތް ފޯރުކޮށްދިން މައްސަލައެއްގައި ޓައިވާނުގެ 4 ކުންފުންޏެއްގެ މައްސަލަ ތަހުގީގުކޮށްފައިވެއެވެ.

ހުއާވޭ ކުންފުނިން އެޑްވާންސް ޗިޕް އުފެއްދުމުގެ ގާބިލްކަން ހޯދަމުން އަންނައިރު، ޗައިނާ އާއި އެމެރިކާއާ ދެމެދު އުފެދިފައިވާ ވިޔަފާރިއާއި ޓެކްނޮލޮޖީގެ ވާދަވެރިކަމުގެ މެދުގައި އެކުންފުނި ވަނީ ތާށިވެފައެވެ.